შემოგვიერთდი

17.08.2013 12:45

„საქმე ჩვენი კომპანიის იმიჯს ეხება, ამიტომ საგამოძიებო კომისიას მაქსიმალურად დავეხმარებით“, - ლევან ყუბანეიშვილი

ნატა ძველიშვილი
ინტერვიუ

კომუნიკაციების ეროვნული კომისიის (GNCC) საქმიაობის შემსწავლელი პარლამენტის დროებითი საგამოძიებო კომისიის საქმიანობის შუალედური ანგარიშის მიხედვით, GNCC ტელეკომპანია GMG-ს ლობირებდა და საკაბელო კომპანიებს მასთან კაბალური ხელშეკრულების გაფორმებას აიძულებდა. რა პასუხი აქვს GMG-ის გენერალურ დირექტორს ლევან ყუბანეიშვილს პარლამენტში შესულ საჩივრებზე, რა ურთიერთობა ჰქონდა GNCC-ის ყოფილ თავმჯდომარეს ირაკლი ჩიქოვანს მასთან და რა შედეგით დასრულდა GMG-ის გენერალურ დირექტორის შეხვედრა საგამოძიებო კომისიის წევრებთან. ამ საკითხებზე Media.Ge ლევან ყუბანეიშვილს ესაუბრა.

 

ლევან ყუბანეიშვილი

- ბატონო ლევან, 13 აგვისტოს თქვენ საგამოძიებო კომისიის წევრებს შეხვდით. რა იყო ამ შეხვედრის მიზანი და რა შედეგით დასრულდა?

- ჩვენი შეხვედრის მიზანი იყო  კომისიის შუალედურ ანგარიშთან დაკავშირებით ჩვენი პოზიციები წარგვედგინა. შეხვედრას ესწრებოდნენ თინა ხიდაშელი, ანი მიროტაძე და ნათია კაპანაძე.  მოვუყევით მოსაზრებები იმ საკთხებთან დაკავშირებით, რაც ანგარიშში GMG-ის ეხებოდა. მაგალითად დამფუძნებლების, მასთან დაკავშრებული პირებისა და კომპანიების საკითხი და გავარკვიეთ, რომ იურიდიულად ყველაფერი წესრიგშია. რაღაც საკითხებზე შევთანხმდით, რომ მივაწვდით ყველანაირ ინფორმაციას. საქმე ჩვენი კომპანიის იმიჯს ეხება, ამიტომ მაქსიმალურად ჩავერთვებით, დავეხმარებით და მაქსიმალურად ბევრ ინფორმაციას მივაწვდით.

- ამ ანგარიშის მიხედვით,  საკაბელო კომპანიები „სუპერ ტვ“ (ყოფილი „აიეტი“) და ახალი ქსელები“ საკუთარ საჩივარში უთითებენ რომ GNCC  თქვენს კომპანიასთან კაბალური ხელშეკრულების დადებას აიძულებდა. რა პასუხი გაქვთ მათ ბრალდებაზე?

- დავიწყებ „ახალი ქსელებით“, რომლის საჩივარი ჩვენთან დაკავშირებით ძალიან მოულოდნელი იყო. ეს არის ჩვენი ერთი-ერთი ყველაზე კარგი პარტნიორი. მათთან უპრობლემოდ გავაფორმეთ ხელშეკრულება. თავის საჩივარში ეს კომპანია წერს - 2010 წლის 16 ივლისს „ახალ ქსელებს“ სანქცია დაადეს იმის გამო, თითქოს ირაკლი ჩიქოვანმა შექმნა საკაბელო კომპანია GMG, მხოლოდ მას ჰქონდა უცხოური არხების რეტრანსლირების უფლება და დანარჩენები აიძულეს მასთან გაეფორმებინა ხელშეკრულება.

2010 წლის 16 ივლისს GMG საერთოდ დაფუძნებულიც არ იყო - ეს ერთი, მეორე - GMG 2012 წლის სექტემბრიდან ახორციელებდა ერთადერთი უცხოური არხის, რუსული CTC-ს რეტრანსლირებას. ჩვენ ვქმნიდით ჩვენს პროდუქციას, ამიტომ ვერანაირად ვერ დავეთანხმები მათ ბრალდებას

- რაც შეეხება აიეტს?

- მათთან ჩვენ  სასამართლო დავა გვაქვს და არ გამკვირვებია. მსგავსი ბრალდებები სასამართლოშიც წარადგინა და ორმა ინსტანციამ ჩვენ გაგვამართლა,  საქმე ახლა უზენაეს სასამართლოშია.

„სუპერ ტვ“-ის ჰქონდა ექსკლუზიური ურთიერთობა GMG-სთან. ხელშეკრულებაში იყო ასეთი პირობა ჩადებული, რომ თუ საკაბელო კომპანია 30 ათას არ გადაუხდიდა GMG-ის, მასთან კონტრაქტის გაფორმების უფლება არ ჰქონდა. 2011 წლის მარტში ამხელა თანხის გადახდა მხოლოდ „სუპერ ტვ“-სა  და GNN-ს შეეძლო, ამ უკანასკნელთან ხელშეკრულება ვერ გავაფორმეთ, არ სურდა მას ჩვენი ჩართვა.

ეს პუნქტი იმდენად კაბალური იყო ჩვენთვის, რომ ამოვაღებინეთ. გარდა ამისა, ჩვენს მიმართ 420 ათასი ლარის ოდენობის ვალი დაუგროვდა და სასამართლოში ვუჩივლეთ.

- საკუთარ პაკეტში GMG -ს ჩასმის შემდეგ სუპერ ტვ“-ის სააბონენტო გადასახადი გაიზარდა.

- დიახ, გააძვირა გადასახადი. 2011 წლის სექტემბრიდან მის პაკეტში აღარ ვართ, თუმცა არ შეუმცირებია ეს თანხა, როგორც მე ვიცი. მათ სასამართლოშიც განაცხადეს, რომ ჩიქოვანი აიძულებდა ხელშეკრულების გაფორმებას და მილიონი ლარის ზარალი მიადგათ. მაგასთან არავის დაურეკავს და არ მოუთხოვია GMG -სთან კონტრაქტი გააფორმეო.

მე პირადად მხოლოდ ერთ შეხვედრას ვესწრებოდი დირექტორთან, ბატონ ჩიგოგიძესთან. ვუთხარი, რომ ხელშეკრულება გაგვეწყვიტა, მან უარი თქვა, თუმცა  იმხელა დავალიანება დაუგროვდათ, რომ სასამართოში წასვლა მომიწია.

- კომისიის ანგარიშში საუბარია გურიის საკაბელო კომპანია „მადიზეც“. მისი დირექტორი ამბობს, რომ ის ჯერ დაიჭირეს, შემდეგ კი საპროცესო შეთანხმების სანაცვლოდ დაათმობინეს სიხშირე, რომელიც მალევე თქვენ იყიდეთ

- ამ კომპანიის საჩივარიც მოულოდნელია, იმიტომ, რომ კარგის მეტი არაფერი გაგვიკეთებია მისთვის.  როცა ჩვენ ვიყიდეთ მაგათგან ლიცენზია, მაშინ ლიცენზიის ღიერბულება ათასი ლარის ფარგლებში მერყეობდა. ჩვენ გადავიხადეთ 14 ათასი ლარი. 10 ათასი იყო დავალიანება მარეგულირებლის მიმართ 4 ათასი ლარი კი პირად ანგარიშზე გადავურიცხეთ.

ჩვენი კომპანიის არც ერთი დამფუძნებელს მათთან 2010 წლის ნოემბრამდე არანაირი შეხება არ გვქონდა და „მადის“ არსებობაც არ ვიცოდით.

- თქვენ შეხვდით „მადის“ დირექტორს ავთანდილ დევიძეს?

- მე არა, მამუკა გამყრელიძეს [GMG-ს დამფუძნებელი] ჰქონდა შეხება. ვიცი, რომ იმ პერიოდში ბატონი დევიძე იყო ძალიან ბედნიერი და კმაყოფილი რომ ჩვენ მოვახერხეთ მისთვის აგვეცილებინა გარკვეული ფინანსური პრობლემები.

- რატომ გადაწყვიტეთ მაინცადამაინც მადის ლიცენზიის შეძენა?

- მამუკამ სექტემბერში გიორგი რატიშვილს [GNCC-ს მაუწყებლობის რეგულირების დეპარტამენტის ყოფილი უფროსი] ჰკითხა, თუ იყო რომელიმე კომპანია, რომლისგანაც შესაძლებელი იქნებოდა ლიცენზიის დაქირავება, რადგან ახალი ლიცენზიის მიღება ვერ ხერხდებოდა. მაშინ ეს აბსოლუტურად მიღებული პრაქტიკა იყო. გიორგიმ გარკვეული პერიოდის შემდეგ მამუკას შესთავაზა, რომ ასეთი კომპანიაა, აქვს დავალიანება მარგულირებლის მიმართ, თუ მზად ვიყავით რომ ვალის საკითხი მოგვეგვარებინა, შეგვეძლო დავკავშირებოდით „მადს“.

კომისიას ვალდებულებაც აქვს, რომ გარკვეული რეკომენდაციები მისცეს მის მიერ რეგულირებად კომპანიებს. აქედან გამომდინარე, არ მგონია რომ რაიმე დარღვევა იყოს GNCC-ის ჩრთვა. მარეგულირებელს ედავებიან, რომ 2010 წლის იანვარში, როცა აზრადაც არ არსებობდა პროექტის იდეა, დევიძეზე ზეწოლას ახდენდნენ და კუდმა, თუ სოდმა დაიჭირა.

- მართალია, GMG 2011 წელს დაარსდა, მაგრამ როდის გადაწყვიტეთ ტელეკომპანიის შექმნა, როდის დაიწყეთ მოსამზადებელი სამუშაოები?

- მე და მამუკა შევხვდით 2010 წლის ივლისის დასაწყისში და ვუთხარი რომ ასეთი იდეა მქონდა. მას მოეწონა, თვის ბოლომდე რაღაც მოანახაზი გავაკეთეთ, დავაფუძნეთ ახალი კომპანია. ნამდვილად შემიძლია გითხრათ, რომ 2010 წლის იანვარში არამც თუ იდეა არ მქონდა, ასეთი კომპანიის შექმნის, მამუკასთანაც ურთიერთობა არ მქონია. არაფერს არ ვლაპარაკობ 2009 წლის 31 ივლისზე, როცა მადის საქმიანობაზე მოკვლევა დაიწყო.

- ირაკლი ჩიქოვანთან რა ურთიერთობა გაქვთ?

- ვმეგობრობთ, ძალიან ახლო მეგობარია. ამაში არაფერია დასამალი. ეს ურთიერთობა არ დაწყებულა ერთი და ორი დღის წინ. დაახლოებით 20 წლის წინ დაიწყო, მანამდე ვიდრე ირაკლი სატელევიზიო სფეროში წავიდოდა სამუშაოდ და მე ტელეკომპანიის გაკეთების იდეა გამიჩნდებოდა. ირაკლი რომ არ ყოფილიყო მაგ პოზიციაზე, მე ამ ბიზნესს მაინც დავიწყებდი. გაჩნდა რეალური ფინანსური რესურისი და გავაკეთე ჩვეულებრივი ბიზნესპროექტი.

- ირაკლი ჩიქოვანის მიერ GMG-ი ლობირებას გამორიცხავთ?

- არ აქვს მნიშვნელობა იმ სახელსა და გვარს, ვინც კომისის თავმჯდომარის პოზიციაზე იყო. ჩვენ გვქონდა იურიდიულად აბსოლურუტად გამართული მოთხოვნები, რომლის დაკმაყოფილება მოუწევდა ნებისმიერ ადამიანს, რომელიც იმ პოსტზე იქნებოდა. თუ სხვა სტრუქტურის კომპეტენციაში იქნებოდა, იქაც ანალოგიურად იქნებოდა.

- ანგრიშში საუბარია იმაზე, რომ ირაკლი ჩიქოვანი ხელს უწყობდა  ბაზარზე GMG- მონოპოლიზაციას .

- როდესაც ჩვენ შემოვედით ბაზარზე ერთადერთი კომპანია, რომელსაც მაუწყებლობა შეეზღუდა იმის გამო, რომ არალიცენზირებულად მაუწყებლობდა იყო нтв + -ის არხები. ეს უფლებები კანონიერად ჩვენ გვქონდა შეძენილი და მარეგულირებელს რომც არ აეკრძალა, თვითონ ის კომპანია მოითხოვდა მათ შეზღუდვას, ვისგანაც ამ სპორტული ღონისძიებების ჩვენების უფლებები ვიყიდეთ.

მონოპოლიზაციაზე საუბარი ზედმეტია. მაგათლითად, Eurosport-ს საქართველოს ტერიტორიაზე გარკვეული ღონისძიებების ჩვენების უფლება ჰქონდა მოპოვებული. აზრადაც არ მოგვსვლია მისთვის რაიმე საჩივარი შეგვეტანა იმ მარტივი მიზეზის გამო, რომ ყველაფერი წესრიგში ჰქონდა. ძალიან მინდა ესპანეთის საფეხბურთო ჩემპიონატი ვაჩვენო, მაგრამ Setanta-ს აქვს ქართულ ენაზე ნაყიდი და ვერაფერს ვერ ვუზამ, ვერ მივაღწიე შეთანხმებას, უნდა და აქვს. ახლა „სილქნეტი“ იწყებს სპორტული არხის კეთებას, ვერაფერს ვუზამ, აქვს მას ეს უფლება და დამთავრდა მანდ ამბავი.

შესაბამისად, მონოპოლისტი მე არ ვიყავი. მე მქონდა გარკვეული ღონისძიენებების ქართულ ენაზე ექსკლუზიურად ჩვენების უფლება, მაგრამ ნებისმიერს შეეძლო სხვა ენაზე იგივე ჩემპიონატები ეჩვენებინა.

პროექტის მხარდამჭერები არიან

Website Security Test