შემოგვიერთდი

10.09.2013 09:26

„რუსთავი 2“ დაბალანსებული საინფორმაციო პოლიტიკის მქონე ერთადერთი არხია - ნიკა გვარამია

ნატა ძველიშვილი
ინტერვიუ

ნიკა გვარამია

საქართველოს კომუნიკაციების ეროვნული კომისიის საქმიანობის შემსწავლელი პარლამენტის დროებითი საგამოძიებო კომისია ტელეკომპანია „რუსთავი 2“-ს სახელმწიფო ბიუჯეტიდან არაპირდაპირ დაფინანსებაში ადანაშაულებს. კომისიის თავმჯდომარე თინა ხიდაშელმა კი განაცხადა, რომ „რუსთავი 2“-ის გენერალური დირექტორი ნიკა გვარამია ერთადერთია, ვინც მათთან არ თანამშრომლობს. რას პასუხობს ნიკა გვარამია თინა ხიდაშელს, ფინანსდებოდა თუ არა სახელმწიფო ბიუჯეტიდან კერძო ტელევიზია და ჰქონდა თუ არა პოლიტიკური სარჩული ნიკა გვარამიას ამ პოზიციაზე დანიშვნას. Media.Ge-ს კითხვებს „რუსთავი 2“-ის გენერალური დირექტორი პასუხობს.

- ბატონო ნიკა, პარლამენტში შექმნილი დროებითი საგამოძიებო კომისიის თავმჯდომარე თინა ხიდაშელი აცხადებს, რომ მხოლოდ თქვენ არ თანამშრომლობთ მათთან.

- ეს არის ტყუილი. ვწუხვარ, რომ ქალბატონი ხიდაშელი, რომელიც საქართველოს პარლამენტის წევრია და მეტი პასუხისმგებლობა მართებს განცხადებების გაკეთების დროს, მარტივად იტყუება. „რუსთავი 2“ არათუ არ თანამშრომლობს, პირდაპირ კარნახობს კომისიას იმ გზებს, რითაც შეძლებს ამ ინფორმაციის მოპოვებას.

მოკლედ განგიმარტავთ, რომ ქალბატონი ხიდაშელის მიერ მთხოვნილია „რუსთავი 2”-ის კომერციული საიდუმლოების შემცველი ინფორმაცია. „რუსთავი 2“ უფლებამოსილი არ არის აღნიშნული ინფორმაცია გასცეს ნებისმიერი, მათ შორის თანამდებობის პირის მოთხოვნის საფუძველზე, გარდა საგადასახადო, ან საგამოძიებო ორგანოებისა, სასამართლოსი და პარლამენტის დროებითი საგამოძიებო კომისია. სწორედ ამიტომაც ჩვენ ვითხოვეთ სწორედ კომისიის გადაწყვეტილება ინფორმაციის მოთხოვნის შესახებ.

სამწუხაროდ, პირველ შემთხვევაში ჩვენ მივიღეთ მხოლოდ საგარეჯოს მაჟორიტარი დეპუტატის, ქალბატონ თინათინ ხიდაშელის წერილი. ეს არის საქართველოს პარლამენტის წევრის ბლანკზე დაწერილი ტექსტი. მეც ვიყავი პარლამენტის წევრი და მარტივად შემიძლია განვასხვავო რა დოკუმენტები მოგვდის. შემდეგ არის უკვე კომისიის თავმჯდომარის წერილი. მინდა, განვუმარტო ქალბატონ ხიდაშელს, რომ კომისიის თავმჯდომარე არ არის სრულად კომისია. ჩვენთვის სახელმძღვანელოა  კომისიის გადაწყვეტილება, რომელიც მიიღება ხმათა უბრალო უმრავლესობით. ჩვენ ამ გადაწყვეტილების ოქმს ვითხოვდით.

ვსვამ ძალიან ლოგიკურ კითხვას,  რა ედგა წინ ამ დოკუმენტის გამოგზავნას ქალბატონი ხიდაშელის წერილების ნაცვლად? ასეთი დოკუმენტი ჩვენ დღემდე არ მიგვიღია, შესაბამისად, არანაირ ინფორმაციას არ გავცემთ. მე, როგორც კომერციული მენეჯერი, არც ვარ უფლებამოსილი, რომ ჩემი საწარმოს, ამ შემთხვევაში ტელევიზიის, კომერციული საიდუმლოების შემცველი ინფორმაცია გავცე. თუ ეს ვინმემ გააკეთა, ეს მისი პრობლემაა და საერთოდ არ მაღელვებს. მე ვხელმძღვანელობ ჩემი კომპეტენციით და ამას არ გავაკეთებ არცერთ შემთხვევაში.

-კომისიის სახელით რომ გამოგზავნონ წერილი თანახმა იქნებით თანამშრომლობაზე?

-ჩემს თანხმობაზე არ არის, მე ვალდებული ვარ და არ ვაპირებ, რომ კანონი დავარღვიო ქალბატონი ხიდაშელის გამო. არც არაფერი მაქვს დასამალი.

-ასევე თინა ხიდაშელმა „რუსთავი 2“-ი სახელმწიფო ბიჯეტიდან არაპირდაპირ დაფინანსებაში დაადანაშაულა.

- ჯერ ერთი, რატომ არის „რუსთავი 2“-ის პრობლემა თუ ვინმემ არასწორად ჩარიცხა და სახელმწიფოს მხრიდან ხარჯი გასწია?  მოკითხონ იმას, ვინც ეს გააკეთა. ეს ზოგადად და რაც შეეხება კონკრეტულად ამ ფაქტებს, არ ვადასტურებ. ამგვარი რამ არ მომხდარა.  ეს არის ტყუილი, მარტივად რომ ვთქვა. არ ვიცი, ქალბატონ ხიდაშელს ამ ინფორმაციის გავრცელება რაში სჭრიდება.

მან ასევე განცხადა, რომ დაკითხვაზე დამიბარებს, შევახსენებ მას, რომ კარგად წაიკითხოს საქართველოს პარლამენტის რეგლამენტი. იმ პროცედურას, რომლისთვისაც ის მიბარებს, არ ჰქვია დაკითხვა. ამ პროცედურას ჰქვია ახსნა-განმარტების ჩამორთმევა. დაკითხვას აწარმოებს სამართალდამცავი ორგანოები. თუ მას საკუთარი თავი წარმოუდგენია პროკურორად, ეს ასევე მისი ამბიციების პრობლემაა. იგი არის საგამოძიებო კომისიის თავმჯდომარე, კეთილი ინებოს და კანონით დადგენილი წესით დამიბაროს, ჩამომართვას ახსნა-განმარტება და არა - დამკითხოს. ეს ისე, განმარტებისთვის - იურისტ ქალბატონ ხიდაშელს.

- წლების განმავლობაში „რუსთავი 2-ს“ „ნაციონალური მოძრაობის“ ინტერესების გატარებაში ადანაშაულებდნენ. თქვენ რას იტყვით „რუსთავი 2“-ის სარედაქციო პოლიტიკაზე, რამდენად დამოუკიდებელია?

- მე არ ვაპირებ წარსულში ჩაღრმავებას, არ არის ჩემი ინტერესის სფერო. მე შემიძლია ვილაპარაკო „რუსთავი 2“-ზე მას შემდეგ, რაც მე ვარ პასუხისმგებელი ამ კომპანიის ფუნქციონირებაზე. „რუსთავი 2“ დღეს არის ერთადერთი ყველაზე დაბალანსებული საინფორმაციო პოლიტიკის მქონე არხი და მე ვიტყოდი მსოფლიო სტანდატრტების მქონე არხი არა მხოლოდ საინფორმაციო კუთხით, არამედ ნებისმიერი სატელევიზიო პროდუქციის თვალსაზრისით. არ ვაპირებთ, რომ მიკერძოებულები ვიყოთ ამ არჩევნებში, განსხვავებით სხვა ტელეკომპანიებისგან, რომლებიც უკვე არიან მიკერძოებულნი. მე ვამაყობ ამ არხით.

რუსთავი 2

- თქვენ იყავით იუსტიციის მინისტრი, განათლების მინისტრი, დღეს კი ხშირად აკრიტიკებთ მთავრობას და მმართველ პარტიას. როგორ ფიქრობთ, არ მოქმედებს თქვენი დამოკიდებულება „რუსთავი 2“-ის აღქმაზე, საზოგადოების განწყობაზე ამ არხის მიმართ?

- მე არ ვაკრიტიკებ ახლანდელ მთავრობას, მე მათ ვაკრიტიკებ ცალკეულ გადაწყვეტილებების გამო და როგორც მოქალაქეს, ამის უფლება მაქვს. ეს არავითარ კავშირში არ არის „რუსთავი 2“-ის საინფორმაციო პოლიტიკასთან. მე არ ვარ ჟურნალსიტი. საინფორმაციო სამასახური დამოუკიდებელი ერთეულია ამ ტელევიზიის.  ვერ ვხედავ, რომ ეს პრობლემას წარმოადგენდეს.

გარდა ამისა, მე არა მხოლოდ ამ მთავრობის გადაწყვეტილებებს ვაკრიტიკებ, არამედ წინა მთავრობასაც და მის ცალკეულ გადაწყვეტლებებსაც. მე კრიტიკული ადამიანი ვარ და მთავრობის წევრი რომ ვიყავი, მაშინაც მქონდა გარკვეული კრიტიკული დამოკიდებულებები, რომელიც არ დამიმალავს, მთავრობის კომფორტული წევრი მე არასდროს არ ვყოფილვარ.

- თქვენი ამ პოსტზე დანიშვნა ბევრისთვის მოულოდნელი იყო. იმასაც ამბობდნენ, რომ „ნაცინალურ მოძრაობისთვის“ ცნობილი იყო თქვენს წინააღმდეგ  საგამოძიებო მოქმედებების დაწყების შესახებ და თქვენ ტელევიზიის დირექტორად დაინიშნეთ იმიტომ, რომ შემდეგ თქვენი დაკავება მედიაზე ზეწოლად შეფასებულიყო.

- მე შევახსენებ ყველას, რომ ჩემს წინააღმდეგ გამოძიება არც იყო დაწყებული, როცა ტელევიზიის დირექტორად დავინიშნე. მე დავიკითხე პირველად დეკემბერში, ამას გარდა არ ვაპირებ და არც არასდროს გამომიყენებია „რუსთავი 2“ ჩემი პირადი ინტერესებისთვის, მაგალითად, ჩემი პროცესის აქცენტირებულად გაშუქებისთვის. ბუნებრივია, რომ ეს აბსურდია. მე დაკავებული ვიყავი ზუსტად იმიტომ, რომ „რუსთავი 2“-ის გენერალური დირექტორი ვარ. ისეთი აბსურდისთვის  დამაკავეს, სამართლებრივად ამის დადასტურება ძალიან გაუჭირდებათ.

- რა ეტაპზეა თქვენი საქმე ახლა?

- სექტემბერში დასრულდება. პრაქტიკურლად დარწმუნებულიც ვარ, რომ კარგად დამთავრდება. როცა მორჩება ჩემი პროცესი, მაშინ ვაპირებ ამ საქმეზე ძალიან ვრცლად საუბარს და კონკრეტული პირების მიმართ ძალიან სერიოზული ბრალდებების დაყენებას,  მათ შორის საერთაშორისო სასამართლოებშიც.

- „საერთაშორისო გამჭვირვალობა- საქართველოს“ კვლევის გამოქვეყნების შემდეგ, გამოჩნდა, რომ  „რუსთავი 2“-ი  ყველაზე მაღალშემოსავლიანი ტელევიზიაა.  როგორ მოახერხეთ შემოსავლების გაზრდა იმ პირობებში, როდესაც სარეკლამო ბაზარი ზოგადად შემცირებულია?

- თუ მე იმიტომ დამნიშნეს, რომ ამას პოლიტიკური სარჩული  ჰქონდა, მაშინ ჩემი მენეჯერული წარმატება ალოგიკურია. ან ერთი უნდა  მომხდარიყო, ან მეორე. დამნიშნეს იმიტომ, რომ იმედი ჰქონდათ, რომ „რუსთავი 2“-ი ფინანსურად გაიმართებოდა და ასევე სარედაქციო პოლიტიკა იქნებოდა დაბალანსებული.

პირდაპირ გეტყვით, რომ „რუსთავი 2“ ერთადერთი ტელევიზიაა, რომელიც საკუთარ თავს ინახავს, ყველა დანარჩენ ტელევიზიას სჭირდება ჩასხმა, მათ შორის ჩვენს უახლოეს კონკურენტებსაც. ყველას ასხამენ  ფულს და ეს ფული არის პოლიტიკური წარმომავლობის. შესაბამისად,  ამ არხების დამოუკიდებლობაზე საუბარი სრულიად ზედმეტია. სარედაქციო პოლიტიკას შეხედეთ და ნახავთ „რუსთვი 2“-ი პოლიტიკურად ანგაჟირებულია, თუ არა და ამის მერე მიპასუხეთ, ჩემი დანიშვნა აქ გამართლებლი იყო თუ არა.

- ახალი სეზონიდან რა პროექტებს გეგმავთ, რა სიახლეები იქნება არხზე?

-ახალ სეზონში გვაქვს გიორგი გაბუნიას ახალი პოლიტიკური ტოქშოუ, რომელიც სამშაბათს ჩაანაცვლებს ნინო შუბლაძის ტოქ შოუ „პოზიციას“. ეს უკანასკნელი დარჩება პარასკევს და მთელ კვირას შეაჯამებს. იქნება ახალი გასართობი პროექტებიც. ძველიც დარჩება და ეთერში გავა ახალი სერიალი, რომელსაც „ფორმულა კრეატივი“ გააკეთებს და მონაწილეობას მიიღებენ ძალიან ცნობილი სახეები. ასევე იქნება რამდენიმე ახალი არაპოლიტიკური გადაცემა.

- გეგმავთ საგანამათლებლო გადაცემების დამატებას? როგორც ვიცით, გოგი გვახარიას შესთავაზეთ Намедни-ს ტიპის გადაცემის გაკეთება.

- ვაპირებთ, რომ ამ მიმართულების გადაცემები შევთავაზოთ მაყურებელს. სამწუხაროდ, გოგისგან პასუხი არ მაქვს. ძალიან მინდა, ასეთი გადაცემა გავაკეთო და გოგი იყოს ავტორი, რადგან ვფიქრობ, ის ერთ-ერთი საუკეთესო მთხრობელია, ძალიან კარგად წერს, საინტერესო ადამიანია ზოგადად და დიდი სიამოვნებით დავუთმობდი „რუსთავი 2“-ის ეთერს.

- რა არის თქვენი მოკლე და გრძელვადიანი გეგმები?

- უახლოესი გეგმაა, რომ მოვიგოთ ეს სეზონი დიდი განსხვავებით. შემდეგი გრძელვადიანი გეგმაა, რომ „რუსთავი 2“ იყოს  მუდმივად პირველი ტელევიზია და შემოსავლები აძლევდეს იმის საშუალებას, რომ არ დასჭირდეს სხვადასხვა ტიპის დახმარებები გარედან იმიტომ, რომ ეს ყოველთვის იწვევს კითხვის ნიშნებს სარედაქციო პოლიტიკის დამოუკიდებლობაზე. 

ნიკა გვარამია

პროექტის მხარდამჭერები არიან

Website Security Test