შემოგვიერთდი

13.12.2013 20:06

„ჩემი მიზანია ბრძოლა პირველობისთვის“, - ბაია გადაბაძე „მაესტროს“ გენერალური დირექტორი

მაია წიკლაური
ინტერვიუ

ბაია გადაბაძე

2014 წლის თებერვლიდან ტელეკომპანია "მაესტროში" ცვლილებები იგეგმება. დაიხურება თუ არა გადაცემა "პოლიტმეტრი"? ვახო სანაიას გარდა კიდევ რომელი ჟურნალისტები გადავლენ "მაესტროზე" სამუშაოდ? როგორი იქნება "მაესტროს" ახალი საინფორმაციო პოლიტიკა? ითანამშრომლებს თუ არა დავით გოგიჩაიშვილის "ღამის შოუს სტუდია" "მაესტროსთან"? - ამ საკითხებზე Media.Ge-ი არხის გენერალურ დირექტორს, ბაია გადაბაძეს ესაუბრა.

გადაბაძე "მაესტროს" გენერალურ დირექტორად 2013 წლის ოქტომბერში დაინიშნა. მას მედიაში მუშაობის 12 წლიანი გამოცდილება აქვს. სხვადასხვა დროს მუშაობდა საზოგადოებრივი მაუწყებლის "პირველ არხზე", ტელეკომპანია "იმედში", რადიო "უცნობში", ტელეკომპანია მაესტროში პროექტ "საკნის" მთავარ პროდუსერად, ჟურნალ "სითიში", "ნანუკა ჟორჟოლიანის შოუში". ბაიას Media.Ge მომავალ თანამშრომლებთან ერთერთი მოლაპარაკების შემდეგ შეხვდა. 

- ბაია, დაახლოებით ორი თვე გავიდა, რაც ტელეკომპანია „მაესტროსდირექტორი ხართ. როგორ შეაფასებამ პერიოდს, რა შეიცვალა ტელევიზიაში თქვენი მოსვლის შემდეგ?

„მაესტროში“ დირექტორად დანიშვნა ძალიან დიდი გამოწვევა იყო ჩემთვის, რადგან მე მოვედი იმ ადამიანებთან სამუშაოდ, რომლებიც იყვნენ ჩვენი მეგობრები და რომლებთან ერთადაც, ძალიან რთული პერიოდი მაქვს გამოვლილი -  დაწყებული ფინანსური კრიზისით, გაგრძელებული ზეწოლებით და მუქარით. პირველად მე „მაესტროსთან“ვთანაშრომლობდი 2008-2009 წელს, როდესაც ტელეკომპანიამ აიღო სამაუწყებლო ლიცენზია პოლიტიკური გადაცემებისთვის. მეორედ, ახლა ვარ „მაესტროს“ გვერდით, როდესაც ძალიან დიდი რებრენდინგის წინაშე დგას ტელეკომპანია, როგორც ვიზუალური, ისე პროფესიული თავლსაზრისით.

როცა ხელმეორედ აქ მოვედი სამუშაოდ, ჩემთვის რთული იყო - ვინმეს რაიმე სხვანაირად არ გაეგო, ან ჩემი ნათქვამი არ მიეღო, როგორც ხელმძღვანელის, რომელმაც ვიღაცაზე მეტი იცის, ან ვიღაცაზე მეტი დამსახურება აქვს. ამ ტელევიზიაში თითოეულ ადამიანს, დაცვიდან დაწყებული, აქვს ძალიან დიდი დამსახურება.

ამიტომ ეს 2 თვე იყო ძალიან რთული პერიოდი. ამ დროის განმავლობაში ჩვენ ეთერში პრაქტიკულად არაფერი შეგვიცვლია. მთავარი მზადება მიდის ახალი ეთერისთვის, რომელიც იმედია, თებერვლის ბოლოს დაიწყება. ამ დროისთვის „მაესტრო“ გადახალისებული ახალი ფორმატით გავა ეთერში.

- სანამ ახალ ეთერზე გადავალთ, ვისაუბროთ „მაესტროს“ წინაშე არსებულ გამოწვევებზე. როგორი ტელევიზია ჩაიბარეთ და თქვენი აზრით, რა უნდა შეიცვალოს ამ ტელევიზიაში აუცილებლად?

ჩავიბარე ტელევიზია, რომელსაც აქვს ძალიან მაღალი ნდობის ხარისხი საზოგადოებაში, რაც არ მოიპოვება არანაირი შეფუთვით, არანაირი გასართობი გადაცემით, არანაირი მეგა შოუებით და არაფრით. მაგრამ პარალელურად, დამხვდა ტელევიზია, სადაც ადამიანები, რომლებმაც აქ დაიწყეს მუშაობა, იყვნენ ბავშვები. მე მახსოვს დრო, როცა ერთხელ მოვედი ტელევიზიაში, სულ 3 ადამიანი ვიყავით - მე, მამუკა ღლონტი და გია გაჩეჩილაძე. ვიკითხე, სად არიან დანარჩენები-თქო, მითხრეს, ბოლო ზარი აქვთო. აი, ამ ადამიანებისგან შედგებოდა „მაესტრო“. ისინი აღარ არიან არასრულწლოვნები, მაგრამ ისინი მიჩვეული არიან ბრძოლას და ეს ბრძოლა, არის ბრძოლა ქუჩაში, ბრძოლა თავისუფალი სიტყვისთვის, ბრძოლა ინფორმაციის მოპოვებისთვის. ამ ადამიანებს აქვთ მთავარი - პრინციპულობა. იმედია, არავინ საწყენად არ მიიღებს,  მაგრამ ამ ადამიანებს სჭირდებათ პროფესიონალიზმის ამაღლება. ამას სჭირდება დრო და სჭირდება გამოცდილება. რასაც იმედია, ყველა ერთად გავაკეთებთ.

მე მაქვს ასეთი დაკვეთა დამფუძნებლებისგან - ტელევიზიაში გარანტირებული ადგილი, ჩემი ჩათვლით, არ აქვს არავის. სამომავლოდ ამ ტელევიზიაში იქნებიან ის ადამიანები, ვინც შეძლებს მასზე დაკისრებული მოვალეობის შესრულებას, რა თქმა უნდა, მათი წარსულის, პრიცნიპულობის და მებრძოლი სულის გათვალისწინებით. მეც მათთან ერთად მომიწევს გადაფორმატება, პროფესიონალიზმის ამაღლება და სხვა სტანდარტებით მუშაობა.

- ანუ იმ ადამიანებმა, ვინც „მაესტროში“ დღეს მუშაობენ, შესაძლებელია თებერვლის ბოლოს ტელევიზია დატოვონ და სხვა უფრო პროფესიონალი კადრები მოიყვანოთ?

- იცი, როგორი რაღაც იგეგმება? იმისათვის, რომ ეს გადანაწილება, რომელიც მოხდება, იყოს ობიექტური და არ იყოს მიბმული არც ჩემზე, არც ნინო ჟიჟილაშვილზე (რომელმაც ჩაიბარა საინფორმაციოს ნაწილი და არის ჩემი მოადგილე და საინფორმაციო სამსახურის კურატორი), არ იყოს პრეტენზია რომელიმე დამფუძნებლის მიმართ, ტელევიზიაში მოგვყავს ყველაზე მიუკერძოებელი და მაღალპროფესიონალი ადამიანები. ვსაუბრობ BBC Trust-ზე, რომელიც დაკომპლქტებულია წამყვანი პროდუსერებით და ჟურნალისტებით. ჩვენ მოვიწვიეთ ისინი ერთი თვით საქართველოში. ჩამოვა 4 ადამიანი, რომელიც დაატრენინგებს როგორც ჟურნალისტებს, ისე პროდუსერებს, ოპერატორებსა და მემონტაჟეებს. ასევე ჩამოვა ადამიანური რესურსების მართვის სპეციალისტი, რომელიც ზუსტად აღუწერს ყველა ჟურნალისტს, რა შედის მის მოვალეობაში.

ეს ადამიანები, ვინც უნდა ჩამოვიდნენ, ამბობენ, რომ ჩვენ საინფორმაციოს ვაკეთებთ პოლიტიკოსებისთვის და არა ხალხისთვის, რაშიც ვეთანხმები. იმიტომ, რომ ჩვენ ერთ პოლიტიკოსს ვწერთ, ვაპასუხებინებთ მეორეს და გვგონია, რომ ეს არის სიუჟეტი. სინამდვილეში ასე არ არის. უნდა გაშუქდეს ხალხის პრობლემა და არა პოლიტიკოსების კითხვა-პასუხი და ერთმანეთში კინკლაობა.

- როგორი უნდა იყოს „მაესტროს“ახალი საინფორმაციო პოლიტიკა?

- სწორედ ამ საკითხების ჩამოყალიბებას ვგეგმავთ იანვარში. 20 იანვარს უკვე ეს ადამიანები ჩამოვლენ და მოგვეხმარებიან, რეკომენდაციებს მოგვცემენ როგორც კონტენტის თვალსაზრისით, ისე გვირჩევენ არსებული თანამშრომლებიდან ვის თვლიან, რომ უნდა დარჩეს ტელევიზიაში, ვის შეუძლია პროფესიულად ზრდა და ვისთან ეს უკვე აღარ გამოვა.

მათი რეკომენდაცია ჩვენთვის იქნება მნიშვნელოვანი თანამშრომლების გაშვება-დატოვების გადაწყვეტილების მიღებისას.  

რაც შეეხება ფორმატს, მათ აქვთ ასეთი მოსაზრება და მე აბსოლუტურად ვეთანხმები, რომ ადამიანები 25 წუთზე მეტი ქრონომეტრაჟის გადაცემას, თუ საინფორმაციო გამოშვებას, სამწუხაროდ, არ უყურებენ. ასევე სრულიად მიუღებელია 5, 6 ან 7 წუთიანი სიუჟეტები. მნიშვნელოვანია, რომ მხოლოდ კადრითაც გაიგოს მაყურებელმა, რაზეა სიუჟეტში საუბარი, თუკი ტელევიზორს ხმას ჩაუწევს. ამ სტანდარტებით ვიხელმძღვანელებთ.

- როგორც მივხვდი, ეს რეფორმები შეეხება ტოქშოუებსაც. ყველა ტოქშოუ დაიხურება, რაც ამჟამად „მაესტროს“ ეთერში გადის?

დღესდღეობით კითხვის ნიშნის ქვეშ დგას ყველაფერი. გადაწყვეტით ჯერ ვერაფერს ვიტყვი. სავარაუდოდ, ტოქშოუები 11 საათიან ზოლში არ გვექნება, რადგან ეს არის ძალიან გვიან. როგორი იქნება ახალი გადაცემები, ამაზე უკვე BBC-ის ტრენერებთან ერთად ვიმუშავებთ. თანაც მიგვაჩნია, რომ რაღაცა დოზით პოლიტიკურმა ტოქშოუებმა, ყოველდღიურმა განსაკუთრებით, ამოწურა თავისი თავი. თუმცა, ეს არ ნიშნავს იმას, როგორც ადრე ხდებოდა ჩვენს არხებზე, რომ გასართობი გადაცემებით ხალხის ყურადღება მნიშნელოვანი საკითხიდან უნიშვნელოვანზე გადაიტანო და ამით დამალო პოლიტიკური გადაწყვეტილებები, ან კრიზისი, რომელიც ქვეყაბნაშია. პირიქით ჩვენ გადავდივართ სოციალური თემატიკის გაშუქებაზე და შემეცნებითი გადაცემების მომზადებაზე. არხი გართობაზე არ იქნება ორიენტირებული, მაგრამ გარკვეული დოზით ესეთი პროგრამებიც იქნება.

- ახლახან თქვენს ოთახში ესაუბრებოდით სოფო ზურაბიანს, რომელიც „პირველ არხზე“ მუშაობდა. ასევე საუბრობდით, რომ მიმდიანრეობს მოლაპარაკებები ვახო სანაიასთან. იგეგმება სხვა ჟურნალისტების გადმოყვანაც კონკურენტი არხებიდან?  

- დიახ. ვახო სანაიაზე შემიძლია დაგიდასტუროთ, რომ ჩვენი თანამშრომელია და იანვრიდან ერთად ვიწყებთ მუშაობას. სოფო ზურაბიანი ასევე გახდა ჩვენი თანამშრომელი და იქნება 9 საათიანი საინფორმაციო გამოშვების ერთერთი მთავარი პროდუსერი და სენიორ რეპორტიორი, როგორც ამას ეძახიან ხოლმე. ის იმუშავებს საერთაშორისო თემებზე და ვფიქრობ, რომ ძალიან დიდი შენაძენია სოფო თავისი პროფესიონალიზმითა და გამოცდილებით.

ჩვენთან იმუშავებს თამარ ჩიხლაძე, რომელსაც ჟურნალისტები კარგად ვიცნობთ. მე პირადად თამუნა ტელეკომპანია „მზეში“ გავიცანი პირველად, როგორც ჟურნალსიტი, შემდეგ იყო კულტურის სამინისტროს პიარსამსახურში. ძალიან გამოცდილია კულტურის სფეროში. ვფიქრობ, რომ კულტურა არ მთავრდება რომელიმე დიზაინერის მაღაზიის გახსნით და ამ საკითხების გაშუქება არის ძალიან დიდი პრობლემა. ამიტომ, მინდა, კულტურა გააშუქოს ადამიანმა, რომელმაც მართლა იცის კულტურის ფასი.

- ნინო დარასელზეც იყო საუბარი, თუ არ ვცდები.

ნინო დარასელთან გვაქვს მოლაპარაკებები. ვფიქრობთ, რომ გადაცემებისთვის, რომლებიც იქნება პოლიტიკური ტოქშოუს და კულტურის მიღმა, გვჭრდება რამდენიმე ადამიანი. კარგი იდეები იბადება მხოლოდ მსჯელობის, კამათის და დავის შემდეგ. მინდა, რომ შეიქმნას ისეთი გუნდი, რომელთან ერთადაც მივიღებ გადაწყვეტილებებს. მე მინდა ამ გუნდში იყოს ნინო, რადგან ის არის ძალიან საინტერესო და ღრმა ადამიანი.

- ნინო ჟიჟილაშვილს რაც შეეხება, ახალ „მაესტროზე“ ის იქნება საინფორმაციო სამსახურის ხელმძღვანელი?

ნინო არის დირექტორის მოადგილე და საინფორმაციო სამსახურის კურატორი.  ეს თანამდებობა მოიაზრებს არხის საინფორმაციო პოლიტიკის განსაზღვრას, მათ შორის, ჩემთან ერთად. შესაბამისად, ნინო ჩაიბარებს ამ ნაწილს.

- გადაცემასაც მოამზადებს?

არ ვარ დარწმუნებული. ალბათ, „პოლიტმეტრი“ დაიხურება ამ ფორმით, როგორც არის. მაგრამ საბოლოო გადაწყვეტილებას ამ თემაზე, მაინც ტრენერებთან ერთად მივიღებთ, რომლებიც კონტენტზე იმუშავებენ ჩვენთან ერთად.

- 2013 წლის ზაფხულიდან მოყოლებული საუბრობდნენ, რომ "მაესტროს" ჰქონდა ფინანსური პრობლემები, იყო ხელფასების გაცემის პრობლემაც. ამის გამო თანამშრომლების ნაწილი შეამცირეთ კიდეც. რამდენადაც ვიცი ახლაც გაქვთ სახელფასო დავალიანება. არხს, რომელიც მესამე ადგილზეა შემოსავლების მხრივ მაუწყებლებს შორის, რატომ აქვს ეს პრობლემა?

ჩვენ მოგვყვება შლეიფი პრობლემებისა, რომელიც „მაესტროს“ ჰქონდა ზოგი წარუმატებელი პროექტის გამო, ზოგი არასწორი დაგეგმვის გამო. ამას ჩვენ ვითვალსიწინებთ იმიტომ, რომ „მაესტრო“ იყო პატარა ტელევიზია თავისი პროტესტის მქონე გადაცემებით და ახლა გადაიქცა დიდ კომპანიად. „მაესტრო“ არ არის მხოლოდ „მაესტრო“. „მაესტროა“ „მაესტრო 24“ და კიდევ ორი რადიო. ადამიანები, რომლებმაც რთული გზა გაიარეს, დავდექით სერიოზული გამოწვევების წინაშე, რასაც ჰქვია დიდი ჰოლდინგი, რომელშიც შენ უშვებ შეცდომებს და საკუთარ შეცდომებზე სწავლობ. ამიტომ ეს პრობლემები განპირპობებულია მხოლოდ ამით. რეიტინგის ზრდასთან ერთად ვიზრდებით, როგორც პროფესიონალები. როგორც სერიოზული კომპანიის მენეჯმენტი, ამიტომ ყველა პრობლემას აუცილებლად მოვაგვარებთ.

შარშან „მაესტრო“ იყო პერსპექტივაში საინტერესო არხი რეკლამის დამკვეთებისთვის. დღესდღეობით ეს ყველაფერი ასახულია ციფრებში. „მაესტროს“ აქვს დაახლოებით 400 პროცენტიანი ზრდა რეიტინგში და იყოფს მეორე მესამე ადგილს ტელეკომპანია „იმედთან“. დიდი იმედი მაქვს, როდესაც სარეკლამო ბიუჯეტის გადანაწილება მოხდება, „მაესტრო“ სამართლიანად მიიღებს იმ წილს, რა ხვედრითი წილიც აქვს რეიტინგებში. ეს კი საკმარისია იმ გეგმების განსახორციელებლად, რომელიც ჩვენ გვაქვს. ჩვენ არ ვაპირებთ ამ ეტაპზე მეგა შოუების და მეგა პროექტების ყიდვას, არა იმიტომ, რომ ჩვენ ამის საშალება არ გვაქვს, არამედ იმიტომ, რომ არ ვთვლით, რომ ეს „მაესტროს“ ნიშაა.

ჩვენ შევძლებთ საკუთარი თავის შენახვას და ის რომ ტელევიზია არ არის მომგებიანი საქართველოში, „მაესტრო“ შეძლებს დაანახოს ყველას, რომ ეს მცდარი წარმოდგენაა, მით უმეტეს იმ კონტექსტში, როდესაც „მაესტროსთვის“ არავის უპატიებია 26 მილიონიანი ვალი. ტელევიზიას, რომელსაც მილიონები აქვს ნაპატიები, აქვს უფლება თქვას, რომ გავიდა მოგებაზე. „მაესტროს“ მხრიდან კი, რომლისთვისაც არავის უპატიებია 26 მილიონიანი ვალი და გავა მოგებაზე, გაცილებით უფრო ამბიციური განაცხადი იქნება.

არ ვიცი, იცით, თუ არა, რომ დათო გოგიჩაიშვილმა „ღამის შოუს სტუდიასთან“ ერთად ჩაიბარა „მაესტრო 24“, სადაც გააკეთებს გასართობ არხს თავის გუნდათ ერთად. სამომავლოდ ესეც სიახლეა.

- რა ფორმით გადაიბარა „ღამის შოუს სტუდიამ“ „მაესტრო 24“?

დათო გოგიჩაიშვილი იქნება ტელეკომპანიის ხელმძღვანელი. „ღამის შოუს სტუდია“ შედგება რამდენიმე დამფუძნებლისგან, ერთერთი არის დავით გოგიჩაიშვილი. „მაესტრო 24“-ის დამფუძნებლები კი იგივე ადამიანები არიან, ვინც „მაესტროსი“ და მათ აქვთ პარტნიორობის ხელშეკრულება დათო გოგიჩაიშვილთან. ჩვენ ვიქნებით პარტნიროები. ჩვენ მთელი საქართველოს მასშტაბით კაბელის საშუალებით ვრცელდებით. მათ აქვთ იდეები და უკვე გამზადებული პროდუქტები. ეს იქნება აბსოლუტურად ახალი, განსხვავებული ფორმატის გასართობი არხი, რომელსაც ეთერში არ ექნება პრაიმტაიმი და ნაკლებად ყურებადი დრო. გადაცემები არის 5-5 წუთიანი და მეორდება გარკვეული სიხშრით.

- „მაესტროსთან“ ასოცირება როგორ მოხდება?

შესაძლოა სახელი შეიცვალოს. დათო გააკეთებს თავის არხს [მაესტრო 24-ის ლიცენზიის ფარგლებში] და პარალელურად მოამზადებს პროექტებს „მაესტროსთვისაც“. ის არის ჩემი კონსულტანტი უკვე ორი თვეა. დათო არის პროფესიონალი. მე მისი რჩევები მანამდეც მაინტერესებდა და ახლა - მითუმეტეს. მიუხედავად ჩემი 12 წლიანი ჟურნალისტური გამოცდილებისა, მაინც ახალი ვარ ამ სფეროში.

- ანუ 24 საათიანმა საინფორმაციო არხმა არ გაამართლა?

24 საათიანი ახალი ამბები რომ გააკეთო, ჯერ უნდა არსებობდეს ამისი გარემო და მეორეც - ამას სჭირდება ძალიან დიდი რესურსი. ორ არხზე ამ რესურსის გაყოფა არის ან დაბალხარისხიანი პროდუქტი, ან ორჯერ უფრო ძვირი.

- უთანხმებთ თუ არა თქვენს გადაწყვეტილებებს არხის დამფუძნებლებს, ან ისინი თუ ერევიან თქვენს საქმიანობაში?

ბაია გადაბაძე

როდესაც მე შემომთავაზეს „მაესტროს“ ხელმძღვანელობა, ასეთ რაღაცაზე შევთანხმდით, რომ სტრატეგიულ გადაწყვეტილებებს მიიღებს დამფუძნებელთა საბჭო, მე ვიღებ გადაწყვეტილებას უშუალოდ ტელევიზიის მიმდინარე და მნიშვენლოვან საკითხებთან დაკავშრებით. შესაძლოა ეს იყოს გადაცემის დამატება, ან - გაუქმება. ამას ვაკეთებ მათთან შეთანხმებით, როდესაც საქმე ეხება გადაცემის წამყვანის მიღებას, ან დატოვებას. მე მათთან გავდივარ კონსულტაციას. დანარჩენ შემთხვევაში გადაწყვეტილებებს ვიღებ დამოუკიდებლად.

რაც შეეხება ვიზუალს, არხის შეფუთვას, წამყვანების ჩაცმულობას, არაპოლიტიკური გადაცემის კონტექსტს - ამ საკითხებში რჩევას აუცილებლად რჩევას ვკითხავ მაკა ასათიანს [„მაესტროს“ ერთერთი დამფუძნებელი] რაც შეეხება მაკას მეუღლეს, კოტე გოგელიას. მასთან ხშირად გავდივარ კონსულტაციას ფინანსურ და მართვის საკითხებზე. კოტე გოგელია არის ძალიან გამოცდილი ფინანსისტი, რასაც ვერ დავიტრაბახებ საკუთარ  თავზე. კოტე ასევე არის ძალიან გამოცდილი მმართველი, იცის მენეჯნემტი, იცის, როგორ ეწყობა სტრუქტურა და ამასთან დაკავშრებითაც გავდივარ კონსულტაციას. ასევე მამუკა ღლონტთან. ანუ, ჩემზეა დამოკიდებული, რამდენადაც მჭირდება, იმდენად ერევიან ჩემს საქმეებში.

- მედიასაშუალებებს, მათ შორის ტელეკომპანია „მაესტროსაც“ აქვთ პრობლემა მოუწესრიგებელ კონტრაქტებთან დაკავშირებით. მას შემდეგ, რაც ახალი შრომის კოდექსი შევიდა ძალაში, აპირებთ თუ არა ამ საკითხების მოგვარებას?

ჩვენ  იანვრიდან გვექნება ხანგრძლივი კონტრაქტები, 1 ან 1+1 წლიანი. თავიდან იქნება გამოსაცდელი ვადა. რა თქმა უნდა, ახალ შრომის კოდექსს ვითავლისწინებთ და ჩვენს იურისტთან ერთად უკვე ვიმსჯელეთ ამ საკითხზე. ჩემთვის ვფიქრობდი, რომ მართლა როზა ლუქსემბურგის საოცნებოა ეს კოდექსი, რადგან ბევრ რაღაცაში არ არის დამქირავებლის უფლება დაცული.

მაგალითად, მე მინდოდა ჩამეწერა კონტრაქტში ესეთი რაღაცა, რომ ადამიანი, რომელიც ჩვენთან მუშაობს, თუ წავა სხვა არხზე სამუშაოდ, საკმაოდ დიდი საჯარიმო სანქცია ექნება. რაზეც თავის დროზე მე თვითონ მაქვს მოწერილი ხელი, მაგალითად, ტელეკომპანია „იმედში“ მუშაობის დროს. თუმცა, ეს მუხლი ეწინააღმდეგება ახალ შრომის კოდექსს და არ ვიცი როგორ უნდა დავიცვა თავი იმისგან, რომ  ჩემი არხის ჟურნალისტი სხვა არხებმა არ გადაიბირონ. რის წინაშეც იდგა, სხვათა შორის, „მაესტრო“ აგვისტოში, როდესაც მიდიოდა ჟურნალისტების მასიური გადაბირება. ასეთი შემთხვევებისგან დასაცავად, მე რაღაც მექანიზმი უნდა მქონდეს, რაც ეხლა არ მაქვს. თუმცა ვემორჩილები იმ შრომის კოდექსს, რომელიც შემოგვთავაზა სახელმწიფომ.

- „მაესტროს“ ყველაზე დიდი მიზანი რა იქნება დაახლოებით 1-2 წლის მანძლზე?

არ მინდა, რომ ზედემტად ამბიციური ადამიანი აღმოვჩნდე. მაგრამ ჩემი მიზანი არის ბრძლა პირველობისთვის. მეორე საპატიო ადგილი მე არ მჭირდება. მით უმეტეს თუ გავითვალისწინებთ, რომ „მაესტრო“ არის მრავალჯერ გამარჯვებული ტელევიზია. ვფიქრობ, ამ ტელევიზიამ ყველაზე დიდი გამარჯვება მოიპოვა ბოლო ერთ წელიწადში, როდესაც დაამტკცია, რომ არჩევნების შემდეგ არავის სატელიტი და აპოლოგეტი არ გახდა.

- თუმცა, საუბარობდნენ, რომ „მაესტროს“ ბიძინა ივანიშვილი აფინანსებდა.

რა თქმა უნდა, აფინანსებდა. ნამდვილად ასე იყო და  ეს არავის დაუმალავს. კიდევ რომელ არხს ვინ აფინანსებდა, ჩვენგან განსხვავებით სხვები ამას ვერ ამბობენ, ამიტომ ამაშიც ძალიან თავისუფალი ვარ. მაქვს ამბიცია, რომ ყველას, ვინც აქ მოვა სამუშაოდ და ვინც ეხლა არის, თქვენი მეშვეობით მივმართო - ბრძოლა მიდის მხოლოდ პირველი ადგილსითვის. „მაესტრო“ ამას იმსახურებს თავისი განვლილი გზის გამო და ბედნიერი ვარ, რომ ესეთი ტელევიზია ჩავიბარე.  

პროექტის მხარდამჭერები არიან

Website Security Test