შემოგვიერთდი

24.10.2012 12:26

„ტაბულას“ მომავალთან დაკავშირებით განცხადებას მალე გავაკეთებთ - თამარ ჩერგოლეიშვილი

მაია წიკლაური
ინტერვიუ

სამოქალაქო განათლების ფონდს კიდევ 3 თვე აქვს იმისთვის, რომ ახალი ტელეკომპანიის სამაუწყებლო ბადე ააწყოს. ფონდმა კერძო საერთო მაუწყებლობის №B21, №B91 და №B99 ლიცენზიები ტელეკომპანია „საქართველოსგან“ შეიძინა. 12 ოქტომბერს კომუნიკაციების ეროვნულმა კომისიამ ლიცენზიების ფონდისათვის გადაცემაზე 3 ხმით ერთის წინააღმდეგ თანხმობა განაცხადა. ტელეკომპანია „სამოქალაქო განათლების ფონდის“ პირველი აქტივი არ არის მედიაში. ფონდი ჟურნალ „ტაბულას“ გამომცემელია. 

როგორ ტელევიზიას გახსნის „სამოქალაქო განათლების ფონდი“, ვინ იმუშავებს ახალ ტელეკომპანიაში ძველი მთავრობიდან, დაიხურება თუ არა ჟურნალი „ტაბულა“ და როგორია გამოცემის სამომავლო გეგმები - ამ თემებზე Media.Ge „ტაბულას“ რედაქტორს, „სამოქალაქო განათლების ფონდის“ დირექტორს და დამფუძნებელს, თამარ ჩერგოლეიშვილს ესაუბრა:

 

ქალბატონო თამარ, სამოქალაქო განათლების ფონდი ხსნის ტელეკომპანიას, როგორც ფონდის დამფუძნებელმა და დირექტორმა რატომ მიიღეთ ეს გადაწყვეტილება და როგორ მიაღწიეთ შეთანხმებას ტელეკომპანია „საქართველოს“ ხელმძღვანელობასთან?

რაც "რუსთავი 2"-თან “შუა დღის” ფორმატში თანამშრომლობა შევწყვიტე, მას შემდეგ გვინდოდა გაგვეკეთებინა სტუდია „ტაბულა“, სადაც პოლიტიკურ და ახალგაზრდულ ტოქშოუებს, სხვადასხვა სახის მუსიკალურ პროდუქტს გავაკეთებდით და შევთავაზებდით სხვადასხვა ტელევიზიას. ეს იდეა არსებობდა, მაგრამ შემდეგ სხვა შესაძლებლობა გაჩნდა - ტელეკომპანია „საქართველოს“ მფლობელს გაუჩნდა ინტერესი, გაეყიდა ლიცენზია და ეს შესაძლებლობა გამოვიყენეთ.

სხვა ტელეკომპანიებზე იყო საუბარი?

იყო საუბარი იმაზე, რომ სხვა ტელევიზიებისთვის, იქნება ეს იმედი, თუ რუსთავი 2 მიგვეცა ჩვენი პროდუქცია. გვინდოდა, გვქონოდა გავლენის გაფართოების საშუალება. გვსურდა ხარისხიანი დებატი შეგვეთავაზებინა საზოგადოებისთვის. ვიღაცა შეიძლებოდა დათანხმებოდა ჩვენ სარედაქციო ხაზს, ვიღაცა - არა, მაგრამ რეალურად სხვადასხვა აზრი ყოფილიყო წარმოდგენილი და გვსურდა ხარისხიანი დებატი შეგვეთავაზებინა ქართველი მაყურებლისთვის და არა ის, რასაც ახლა ვხედავთ ტელესივრცეში.

ანუ არჩვენებამდე უკვე რაღაც გეგმა იყო ტელევიზიის გახსნის?

კი, უბრალოდ არჩვენების წინ ბუნებრივია მე ამას არ ვიზამდი. მაგრამ, უფრო სტუდიაზე ვფიქრობდით, დღეს,  ტელეკომპანია „საქართველოსგან“ შეძენილი ლიცენზიების მეშვეობით ვიმაუწყებლებთ ურბანულ ცენტრებში: თბილისში, ქუთაისში, ბათუმში, გორში, ასევე საჩხერესა და სენაკში.

თქვენი მოლაპარაკება „საქართველოსთან“ იყო თანხის გარეშე გარიგება ორ კერძო მხარეს შორის, თუ კონკრეტული თანხა გადაიხადეთ ამ ლიცენზიების შეძენისას?

ჩვეულებრივ რაც იყო ლიცენზიის საბაზრო ღირებულება, ის თანხა გადავიხადეთ 3 ლიცენზიაში. იყო მედიაში საუბრები, რომ ლიცენზია უფასოდ გადმოგვეცა. ასე არ არის. თანხის ოდენობა, ჩავთვალოთ, რომ კომერციული საიდუმლოა. ჩვენ ლიცენზია ვიყიდეთ.

რაც შეეხება კომუნიკაციების კომისიის როლს ამ საქმეში, მისი ერთადერთი მისია იყო, რომ დაედგინა რამდენად სამართლებრივი იყო ჩვენი ფონდის მიერ სამაუწყებლო ლიცენზიის ფლობა. ანუ, ვართ თუ არა ოფშორში რეგისტრირებული და ვაკმაყოფილებთ თუ არა კანონით გათვალისწინებულ სხვა მოთხოვნებს. ამ დროს კომუნიკაციების კომისიის ერთმა წევრმა მიიჩნია, რომ ჩვენ არ გვქონდა ამ ლიცენზიის მიღების უფლება, რადგან ტელეკომპანია „საქართველო“ არ ასრულებდა კანონით დაკისრებულ ვალდებულებებს. მისი არგუმენტი ვერ გავიგე - თუკი „საქართველო“ არ ასრულებდა თავის დროზე რაიმე ვალდებულებას, მას როგორც კომისიის წევრს შეეძლო ზომები მიეღო - მიეცა გაფრთხილება.ჩვენი ფონდი არ არის „საქართველოს“ სამართალმემკვიდრე, ჩვენ მხოლოდ მისი კონკრეტული აქტივი -  ლიცენზიები შევიძინეთ.

ერიცხება თუ არა დავალიანება ამ ლიცენზიებს, რაც საქართველოსგან მიიღეთ?

კი, 45 ათასი ლარი დაგვრჩა გადასახდელი ბიუჯეტში. გრაფიკია შედგენილი და ამ გრაფიკს დავიცავთ აუცილებლად.

რაც შეეხება ტექნიკას, მიიღეთ რამე „საქართველოსგან“? დღეს (23 ოქტომბერი) ტელეკომპანია „რეალ ტვ“-ის მფლობელმა ლალი ეგაძემ განაცხადა, რომ ტელეკომპანია „საქართველომ“ „რეალ ტვ“-დან გარკვეული ტექნიკა, მათ შორის საეთერო პულტი გაიტანა.

წარმოდგენა არ მაქვს ამაზე. მე „საქართველოს“ მფლობელი არ ვარ და არანაირი კავშირი არ მაქვს მათ ვალდებულებებთან, ქონებასთან, ან ქმედებებთან.

შეიძლება „საქართველოსგან“, ისევე როგორც სხვა ტელეკომპანიისგან მე ვიყიდო ტექნიკური საშუალებები. მაგალითად გადამცემ აპარატურას ტელეკომპანია „საქართველოსგან“ ნამდვილად ვყიდულობ, რადგან ჩვენი სიხშირე მორგებულია იმ გადამცემებს.

რაც შეეხება სხვა აპარატურას, როგორია თქვენი ტექნიკური ბაზა?

ეხლა ვაკეთებთ ნუსხას იმ აპარატურის, რაც შეიძლება დაგვჭირდეს. მოვიკითხავთ ბაზარზე რა არის, რა შეიძლება სხვა არხებიდან ვიყიდოთ, რა ჩამოვიტანოთ. რაღაცა ტექნიკა ჩვენც გვაქვს „ტაბულაში“, სამონტაჟო კომპიუტერები, მაგალითად. კარგად უნდა გავაიროთ ეს საკითხი.

ეხლა გავრბივარ დუდუ კურდღელიასთან, რომელიც ტექნიკურ ნაწილში კარგად ერკვევა. სხვა საკითხებზე კონსულტაციებს სხვა გამოცდილი ადამიანებისგან ვიღებ. მაგალითად გუშინწინ მქონდა შეხვედრა ნიკა ტაბატაძესთან. მე ხომ ეს საქმე არ მიკეთებია არასდროს და ისეთ ადამიანებს უნდა ვკითხო, ვისაც ჩემზე უკეთ ესმით და გამოცდილები არიან.

მხოლოდ კონსულტაციებს გიწევენ ეს ადმაინები?

კი  - მათი აზრი ჩემთვის მნიშვნელოვანია. როგორც  ბადის დაგეგმვის, ისე საჭირო რაოდენობის და კვალიფიკაციის კადრების შერჩევის თვალსაზრისით.

ტელეკომპანიას რა ერქმევა?

ვფიქრობთ რამდენიმე ვარიანტზე, ჯერ ჩამოყალიბებული არ ვართ.განვიხილავთ აბრევიატურების ვარიანტებს. სახელზე და ყველაფერზე მეტად ახლა ბიუჯეტი გვაინტერესებს და ვგეგმავთ.  იმ პირობებში, როდესაც კახა ბენდუქიძეა ერთ-ერთი დამფინანსებელი, განსაკუთრებით მნიშვნელოვანია ჩემი მხრიდან სწორი დაგეგმვა. კახა არის ადამიანი, რომელსაც ყველა კაპიკი არგუმენტირებულად უნდა მოსთხოვო. ამიტომ თითქმის ყოველ საღამოს ვსხედვართ და ვმსჯელობთ, ვკამათობთ, ძალიან სასიამოვნო პროცესია.

ტელეკომპანიის მიმართულება როგორი იქნება, გაქვთ უკვე გარკვეული მოანხაზი? რა ნიშას დაიკავებთ?

ეს იქნება მცირებიუჯეტიანი საინფორმაციო/სასწავლო არხი. მეც და კახასაც მიგვაჩნია, რომ წარმატებული პროექტი ფინანსურად მდგრადი უნდა იყოს. მილიონების ინვესტირებას აქ არავინ აპირებს. ამ მოცემულობიდან გამომდინარე, ყველაზე იაფი ჯდება პირდაპირ ეთერში საუბარი. ვფიქრობ, ყველაზე მეტად ეს აკლია ტელესივრცეს, თან ისეთი ადამიანების დასმა, რომლებიც ხარისხიანი დისკუსიის შეთავაზებას მოახერხებენ. ჩვენ ასეთი ადამიანები გარშემო უკვე ძალიან ბევრი გვყავს. მთავრობა შეიცვალა, არის ახალი მთავრობა და ის ადმიანები, რომლებიც ადრე სამოქალაქო სექტორიდან ძველმა მთავრობამ შეიწოვა, თავისუფლები არიან. მათ შეუძლიათ, კომენტატორების სახით და არა მთავრობის პოზიციიდან, დამოუკიდებლად ისაუბრონ. შესაბამისად გვექნება ბევრი ტოქშოუ.

ძალიან მოგვწონს ერთი გადაცემა FOX-ზე - „The 5“ქვია. 5 მუდმივი წამყვანი მსჯელობს მიმდინარე პოლიტიკურ მოვლენებზე. ჩვენ გვსურს მუდმივი წამყვანების ნაცვლად, 30-მდე ადამიანი დავაინტერესოთ, რომლებიც რიგრიგობით მიიღებენ მონაწილეობას ამ გადაცემაში, 15 ადამიანი უკვე ვართ ფონდში. ვფიქრობ, მე და ქეთი დევდარიანს შეიძლება გამოგვივიდეს მშვენიერი დებატი გენდერულ საკითხებზე და სიტყვის თავისუფლებაზე. ამ საკითხებთან დაკავშირებით, ჩვენ განსხვავებული მოსაზრებები გვაქვს. ვთქვათ, იგივე სოციალურ თემებზე  ხარისხიანი დებატი გამოუვიდეთ კახა ბენდუქიძეს და გიგა ზედანიას. მიუხედავად იმისა, რომ ფონდის წევრები ძირითად ღირებულებებზე ვთანხმდებით, განსხვავებული პოზიციები გვაქვს კონკრეტულ საკითხებზე.

არის სტერეოტიპი, რომ თუ საუბრობ კვალიფიციურად სერიოზულ თემებზე, შენ ხარ მოსაყწენი და არავინ გიყურებს. ეს ასე არ არის. კახა ბენდუქიძე არის კვალიფიციური და საუბრობს სერიოზულ თემებზე და იმ გადაცემებს, სადაც ის მონაწილეობს, ყოველთვის ძალიან მაღალი რეიტინგი აქვს.

მთავრობის ყოფილი წევრებიდან ვინ წამოვიდა მოლაპარაკებებზე, ვინ შეიძლება ვიხილოთ თქვენს ტელეკომპანიაში?

ოთო კახიძე, ანდრო გიგაური, თამუნა კოვზირიძე, ვატო ლეჟავა, ეკა ზღულაძე და ა. შ.  - ესენი არიან ჩვენი თანამოაზრეები, ჩვენი მეგობრები. ადრე თუ ისინი გარკვეულ ჩარჩოებში ისხდნენ რადგან აღმასრულებელ ხელისუფლებას წარმოადგენდნენ, დღეს თავისუფლები არიან.ზოგიერთმა მათგანი თავისუფალ უნივერსიტეტში იმუშავებს. როცა მაგალითად ვსაუბრობთ ევროპასთან დაახლოების პოლიტიკაზე, თამუნა კოვზირიძეზე უკეთ ამაზე ცოტა თუ ისაუბრებს, იმიტომ რომ ეს პროცესი აქამდე მისი უშუალო მონაწილეობით ხორციელდებოდა. სერგი კაპანაძეზე უკეთ ჟენევის მოალაპრაკებების პროცესის შეფასება სხვას გაუჭირდება, რადგან თვითონ იყო ამ პროცესის მონაწილე.

სხვა რა გადაცემებზე ფიქრობთ?

დასაწყისშივე გვექნება საინფორმაციო გამოშვება, რადგან ლიცენზია ამას გვავალდებულებს.შესაძლოა თავიდან ევრონიუსის ფორმატს დავჯერდეთ - საათში ერთხელ ჭრა გვქონდეს 10 წუთიანი ნიუსით. მთავარ საინფორმაციო გამოშვებაში დებატიც გვექნება,

ვფიქრობთ ფარულ კამერაზე. შესაძლოა გვქონდეს ისეთი პროექტიც, რომელიც შეამოწმებს იღებს თუ არა პოლიციელი ქრთამს, რა ხდება საბაჟოზე და ა. შ. ადრე თავისუფლების ინსტიტუტს ჰქონდა მსგავსი პროექტი და ძალიან მომწონდა,

ახალი მთავრობის მაკონტროლებელი უნდა გახდეთ?

არა, მხოლოდ ახალი მთავრობის არა. იმისი ანალიზიც გვინდა გავაკეთოთ, რა შეეშალა ძველ მთავრობას. რატომ წააგო „ნაციონალურმა მოძრაობამ“. თუ “ნაციონალურ მოძრაობას”სურს განიცადოს კათარზისი, როგორც პრეზიდენტმა თქვა, პირველ რიგში უნდა გაიაზროს შეცდომები და ამაზე ხმამაღლა საუბარს არ მოერიდოს.

გარდა ამისა, გვინდა ახალგაზრდული ტოქშოუ. დაახოლებით ისეთი, როგორიც „კედელი“ იყო, სადაც ვისაუბრებთ ყველა იმ თემაზე, რაც ახალგაზრდობას აღელვებს.

ნიშური ჟურნალი შეიძლება გააკეთო და აღმოჩნდეს წარმატებული და მოგიტანოს რეკლამა, მაგრამ ტელევიზია მაინც უნდა იყოს გათვლილი ბევრ ჯგუფზე, იმიტომ, რომ დღის განმავლობაში სხვადასხვა მაყურებელი ყავს. დილას ყავს თავისი მაყურებელი, ის, ვინც მუშაობს და სამსახურში გარბის. შუა დღისას უფრო მეტად დიასახლისები უყურებენ ტელევიზორს. თუმცა მაინც ვფიქრობ, რომ ჩვენი მაყურებელი იქნება საშუალოზემაღალი განათლების, რომელმაც ამდენი ხანს ვერ დაინახა ტელესივრცეში ის, რისი ხილვაც უნდოდა და ჩვენ უნდა დავანახოთ. არ ვიცი ამას რამდენად შევძლებთ და როგორ მოვახერხებთ, მაგრამ ჩვენ გვსურს გავაკეთოთ ის, რაც მკვეთრად  განსხვავდება იმისგან, რაც არის.

ტელევიზიასთან ერთად ჟურნალი და ვებიც გააგრძელებს არსებობას?

ეხლა ვფიქრობთ, რა გავაკეთოთ. ერთია, რომ თავსითავად ჟურნალს ცალკე დამოუკიდებელი დაფინანსება აქვს და ჯერჯერობით ამ დაფინანსებას არაფერი არ ემუქრება. ეს ფული არსებობს და რაკი ეს ფული არსებობს, საკითხი დგას, როგორ მოვიხმარო ეფექტურად - გვიღირს  რომ მაშინ, როდესაც წვდომა გვეექნება ასეულობით ათას ადამიანზე ტელევიზიით, 20 ათასი ჟურნალი დავბეჭდოთ თურქეთში, დავხარჯოთ ფული ტრანსპორტირებაში? თუ ფული და ენერგია ვების და ტელევიზიის განვითარებას მოვახმაროთ? - ამაზე ეხლა ვყალიბდებით და „ტაბულას“ მომავალთან დაკავშირებით განცხადებას მალე გავაკეთებთ. „ტაბულა“ ყველა შემთხვევაში რჩება ცალკე ორგანიზმად, რა ფორმით, ამის შესახებ შეიტყობთ.

ანუ, შეიძლება ბეჭდური გამოცემა დაიხუროს?

ვფიქრობთ. გვინდა ვები იყოს ძალიან აქტიური. ვებით გვინდა მოვიზიდოთ ის მაყურებელი, რომელიც ტელევიზიამ დაკარგა ახალგაზრდების სახით. გვინდა, ვებისთვის ცალკე კეთდებოდეს კომპრესირებული ვერსია იგივე ტოქშოუების, რომელიც ვირუსებივით გავრცელდება ინტერნეტში. როცა გია ნოდია დაწერს მოსაზრებას, ის დავპატიჟოთ ტელევიზიაში და ვისაუბროთ იმავე თემაზე ვრცლად.

ძალიან ბევრ მედიაგამოცემას არჩევნების შემდეგ შეექმნა ფინანსური პრობლემები, თქვენთან ეს პრობლემა დღეს არ დგას?

ჩვენ ჯერ ჯერობით ფინანსური პრობლემა არ შეგვქმნია. ქართულენოვანი ბეჭდური ვარიანტი რჩება თუ არა, ფინანსების დაკლებასთან არ არის დაკავშირებული. მაგრამ ფინანსური რესურსის სწორად გამოყენების საკითხი ნამდვილად დგას - მითუმეტეს ტელევიზიის პირობებში. ამას გარდა ჩვენს ენერგიაზეც არის საუბარი. 3 თვეში ტელევიზია გვაქვს ასაწყობი. ამის პარალელურად ყოველკვირეული ჟურნალის გამოცემა დიდ ენერგიას მოითხოვს. ჩვენ ყოველთვის ძალიან ვღელავთ იმ პროდუქტის ხარისხზე, რასაც ჩვენი პროდუქტი ქვია.

სარეკლამო შემოსავალი არ შემცირებულა - ის ადამიანები, ვინც ჩვენ რეკლამას გვაძლევდნენ, გვაძლევდნენ არა იმიტომ, რომ მე გიგა ბოკერიას ცოლი ვარ, არამედ იმიტომ, რომ ბიზნესისთვის სასარგებლო საკითხებს ვაყენებდით - ნაკლები რეგულაცია, დაბალი გადასახადები და ა. შ.  ბიზნესი „ტაბულას“ ბუნებრივი მოკავშირე იყო. მამუკა ხაზარაძეს არავინ არ “დატუქსავდა”იმის გამო, რომ „ტაბულაში“ არ ჩადო რეკლამა. ამასთან, ჩვენ გვქონდა ძალიან გამართული მარკეტინგი, ვიცოდით, როგორ აგვეხსნა ბიზნესისთვის, რომ მათ ინტერესებს ვიცავდით.

თანამშრომლების გადანაწილება როგორ მოხდება?

„ტაბულას“ ვებს რადგან ვინარჩუნებთ, ადამიანურ რესურსის გადანაწილება მოგვიწევს. ზოგიერთი იმუშავებს ტელევიზიაშიც და ვებზეც, შესაბამისად, ხელფასს ორივეგან აიღებს.

შევხედავთ, ვინ გამოდგება ტელევიზიისთვის და ვინ არა. მაგალითად, შესაძლოა ლევან სუთიძე კარგი რეპორტიორი არ იყოს, მაგრამ რელიგიურ თემებზე მასზე უკეთ ცოტა იმუშავებს. ამასთან სანახავია, ვინ როგორ იმუშავებს კამერასთან.

პროექტის მხარდამჭერები არიან

Website Security Test