შემოგვიერთდი

06.11.2012 16:36

„არაფერში დამნაშავე არ ვარ“ - ირაკლი ჩიქოვანი

მაია წიკლაური
ინტერვიუ

კომუნიკაციების ეროვნული კომისიის მიმართ ბრალდებები ბოლო პერიოდში გაიზარდა. კომისიის თავმჯდომარე ირაკლი ჩიქოვანის ინტერესთა კონფლიქტსა და მის გადაყენებაზე უკვე პარლამენტის წევრები საუბრობენ. კომისიის ყოფილმა თანამშრომელმა გიორგი რატიშვილმა კი 6 ნოემბერს ტელეკომპანია „მაესტროს“ ეთერით ირაკლი ჩიქოვანის აუდიო ჩანაწერი გაავრცელა და კომისიის თავმჯდომარე „კანვკასუს ონლაინის“ მიერ ჩადენილი კანონდარღვევის დაფარვაში დაადანაშაულა. რას ფიქრობს ირაკლი ჩიქოვანი ამ ჩანაწერზე, აფარებდა თუ არა ხელს „კავკასუს ონლაინს“ და აქვს თუ არა ინტერესთა კონფლიქტი - ამ კითხვებზე პასუხის მიღება Media.Ge-მ ირაკლი ჩიქოვანისგან სცადა.

ბატონო ირაკლი, ტელეკომპანია „მაესტროს“ ეთერში გასულ ფარულ ჩანაწერს, ალბათ, თქვენც მოისმენდით, ადასტურებთ, რომ იმ ჩანაწერში თქვენი ხმა ისმის?

ხმა აშკარად ჩემია. მე ავიყვანე ადვოკატი ემზარ პაქსაძე, რომელიც გაარკვევს, რამდენად კანონიერია ასეთი ჩანაწერი და  ხომ არ არის ტექსტი დამახინჯებული.

შესაძლებელია, რომ ამ ჩანაწერის გამო სამართლებრივი დავა დაიწყოთ?

ეს იურისტების გადასაწყვეტია, მე ვერ გეტყვით. მე ვთხოვე ჩემს ადვოკატს, რომ ამ საქმეს სამართლებირვი შეფასება მისცეს.  დარწმუნებული ვარ, ჩემზე კიდევ  ბევრ რამეს იტყვიან.

ამ ჩანაწერში თქვენ „კავაკსუს ონლაინის“ წარმომადგენლებს ხელშეკრულების ძველი რიცხვით დარეგისტრირებას სთავაზობთ

თუ კარგად მოისმენთ, იქ გარკვევით არის მესიჯი, რომ უკანონო მუშაობა არ შეიძლება. ჩვენ ამას ვეუბნებით ყველა ოპერატრს - მოაწესრიგეთ დოკუმენტები,სანამ შემოწმება ჩატარდება და ოქმი შედგება, რომ არ დაგაკისროთ სანქცია. რაც შეეხება ძველი რიცვხით დოკუმენტების გაფორმებას, ამის ნახვა არის ძალიან მარტივი. ნებისმიერს  შეუძლია მობრძანდეს და ნახოს, რა არის ძველი რიცხვით ჩადებული. მართლაც განხორციელდა თუ არა ასეთი ქმედება, ხომ უნდა გამოიკვლიონ. ეს არის მიზანდასახული შავი პიარი ჩემს წინააღმდეგ.

ამავე ჩანაწერიდან ირკვევა, რომ 10 თვის განმავლობაში ხელს აფარებდით „კავკასუს ონლაინს“. იცოდით, რომ ხელშეკრულება არ ჰქონდა წამოდგენილი და კომისიას რეაგირება არ მოუხდენია, მაშინ როდესაც სხვა საკაბელოებს აქტიურად უწესებდა სანქციებს

იმას ვის ვაჯარიმებდით და ვის არა, ეს ინფორმაცია უკვე ბევრჯერ არის გამოთხოვილი, როგორც არასამთავრობო ორგანიზაციების, ისე საკაბელო კომპანიების მიერ. არსად არ ჩანს, რომ ვინმეს ხელს ვაფარებდით, ან არ ვაფარებდით. წელიწადნახევარი მონიტორინგს გვიკეთებდა „ლევან მიქელაძის სახელობის ფონდი“ და „ახალგაზრდა იურისტთა ასოციაცია“ და ერთადერთი დარღვევა, რაც აღმოაჩინეს, არის ის, რომ თითქოს მე მაქვს ინეტრესთა კონფლიქტი.

„კავკასუს ონლაინს“ დღეს ეს ხელშეკრულებები  კომისიაში აქვს წარმოდგენილი?

დავაჯარიმეთ ეს კომპანია და ბოლოს რა ხელშეკრულებები მოიტანეს, არ ვიცი. მანამდეც იყო გაფრთხილებული. ახლა საკმაოდ სოლიდური ჯარიმის გადახდა მოუწევთ.

გიორგი რატიშვილი, რომელმაც ეს ჩანაწერი გაავრცელა ამბობს, რომ ირაკლი ჩიქოვანი ლოიალურად იყო განწყობილი GMG-ის მიმართაც და ამ კომპანიის მიერ წარმოდგენილი ხელშეკრულებები მისთვის ხელმიუწვდომელი იყო.

GMG-ის მიერ წარმოდგენილი ხელშეკრულებები გამოთხოვილი აქვს „სუპერ ტივის“ და  „მაგთისატს“. ამ ხელშეკრულებების 80 პროცენტი პირადად რატიშვილს აწერია, დღეს შევამოწმე. როგორ იყო მიუწვდომელი ის, რაც მას ეწერა?!

რადიო „ჰერეთმა“ გაავრცელა განცხადება, სადაც ის გამოთქვამს ვარაუდს, რომ სიხშირეების განაწილებაც გარიგების საფუძველზე ხდებოდა, რის გამოც „ჰერეთმა“ ვერ მოახერხა თბილისში მაუწყებლობის ლიცენზიის მიღება

ანუ მე რადიო „ცხელ შოკოლადს“ გავურიგდი? აბსურდზე რა პასუხი გაგცეთ. „ჰერეთმა“ ისიც მოიწერა თავისუფალი სიხშირეები არსებობს და რამდენიმე რადიო ლიცენზიის შეუსაბამოდ მაუწყებლობსო. მივწერე, რომელი მაუწყებელი თქვით მეთქი და არ გვპასუხობს. ყველას ავიწყდება, რომ მთელი კომისია მე არ ვარ. ჩემს გარდა აქ ოთხი წევრია და ყველა გარიგებულია?

მას შემდეგ რაც ახალი ხელისუფლება მოვიდა, დაიწყო საუბარი იმაზე, რომ პარლამენტი კომუნიკაციების ეროვნული კომისიის თავმჯდომარის საკითხს განიხილავს, რამდენად რეალურად მიგაჩნიათ ის ფაქტი, რომ შესაძლოა პარლამენტმა თქვენი თანამდებობიდან გადაყენებაზე  გადაწყვეტილება მიიღოს?

ამაზე ვერ გიპასუხებთ

 „მაუწყებლობის შესახებ“ კანონის თანახმად, პარლამენტის სიითი შემადგენლობის არანაკლებ ერთ მესამედს ინტერესთა კონფლიქტის შემთხვევაში შეუძლია აღძრას კომისიის წევრის თანამდებობიდან გათავისუფლების პროცედურა. ბოლო პერიოდში თქვენი ოპონენტები სწორედ თქვენს ინტერესთა კონფლიქტზე აპელირებენ.

როდესაც აქ ვინიშნებოდი გარკვევით დავწერე, რომ „მაგი სტილი მედიას“ დამფუძნებელი ვიყავი. თუ ეს უკანონო იყო, ვერ გადავაფორმებდი სხვაზე? რთული იქნებოდა? არ გაგიგიათ რომ ფირმები ფორმდება სხვადასხვა პირებზე? ამას ერთი დღე უნდა, მეტი არაფერი. არ გავაკეთე იმიტომ, რომ კანონს არ ვარღვევ.

არაფრის თავის მართლებას არ ვაპირებ. არაფერში არ ვარ დამნაშავე საერთოდ. ღიაა კომისია, ღია ვარ მეც. ნებისმიერ საკითხზე გავცემ პასუხს. მივლინებაში მივდივარ 8 ნოემბერს და 4 დღეში ჩამოვდივარ, არ გავრბივარ.

ამბობენ იმასაც, რომ ოპერატორები ქრთამს არ აძლევენ, მაგრამ „მაგი სტილში“ მიაქვთ რეკლამა. მე კომისიაში 2009 წელს დავინიშნე. მაგალითად „ჯეოსელი“ ამ კომპანიის დამკვეთია 6 წელია.რა „ჯეოსელმა“ განჭვრიტა, რომ მე თავმჯდომარე გავხდებოდი? „კავკასუს ონალინი“კი საერთოდ არ არის ჩვენი დამკვეთი. 

როდესაც თქვენ ამბობთ, რომ ინტერესთა კონფლიქტი არ გაქვთ, ამის საწინააღმდეგოდ ტელეკომპანია „რუსთავი 2“-ის მიერ სარეკლამო ლიმიტების დარღვევას ასახელებენ. „მაგი სტილი მედია“ რეკლამას ამ ტელეკომპანიის ეთერში ათავსებდა, კომისია კი რატომღაც ვერ ამჩნევდა ლიმიტის სისტემატურ დარღვევას. კომისია ამ საკითხით მხოლოდ „მონიტორის“ მიერ შეტანილი საჩივრის შემდეგ დაინტერესდა. ოპონენტები ამბობენ, რომ ირაკლი ჩიქოვანის ინტერსში შედიოდა  რაც შეიძლება მეტი რეკალმა გასულიყო „რუსთავი 2“-ის ეთერით.

სულელური ბრალდებაა. კომისია არ არეგულირებს რეკლამას. სარეკლამო ჭრების დარღვევეისთვის ორ-ორჯერ გვყავს დაჯარიმებული „რუსთავი 2“ და „იმედი“

თუმცა მხოლოდ „მონიტორის“ საჩივრის შემდეგ.

მაგრამ ხომ არ გავჩერდით, თვალი დავხუჭეთ ამაზე? რეაგირება არ მოვახდინეთ? მეტსაც გეტყვით, იმასაც იძახიან, რომ მე გავაზრდევინე პარლამენტს სარეკლამო ლიმიტები. თურმე, მე ვმართავ ყველაფერს. თუ ვინმეს ოდნავ მაინც ესმის სარეკლამო ბიზნესი, იცის, რომ მეტი სარეკლამო ჭრა სულაც არ ნიშნავს მეტი ფული შემოსვლას ტელევიზიაში. შეამცირე სარეკლამო ჭრა და გაზარდე რეკლამის თანხა - ეს ხომ უფრო მარტივია და სწორი, ჩემი აზრით, ყურებადობა იზრდება.

კომისიას შემდეგაც არ შეუმოწმებია არც „რუსთავი 2“ და არც სხვა ტელეკომპანიები, რამდენად იცავდნენ ისინი რეკლამისთვის დადგენილ წესებს. ფიქრობთ, რომ  ეფექტურად მუშაობს კომისიის მონიტორინგის სამსახური?

მონიტორინგის სამსახური არის საკმაოდ დამოუკიდებელი ორგანო, რომელიც თვითონ განსაზღვრავს, სად უნდა წავიდეს,  რა, ვინ და რა მეთოდით უნდა შეამოწმოს. თუ მოდის მონიტორინგის სამსახური და მეუბნება სად მიდიან, მე თანხმობას ვაძლევ.

თქვენ არ იღებთ მონაწილეობას?

ბუნებრივია, მე ვიცი, რომ მონიტოირნგის სამსახური მიდის შესამოწმებლად. ეს კომისიის სხვა წევრებმაც იციან. ეს ხდება როგორც მათი ინიციატივით, ასევე ვიღაცის საჩივრის საფუძველზე. ვერ გეტყვით, რომ ძალიან დიდი რესურსი გვაქვს. ბევრი ხალხი არ მუშაობს ამ კომისიაში. ამიტომ ყველაფერს ფიზიკურად ვერ ვასწრებთ

მონიტორინგის სამსახურს არც ის დაუფიქსირებია, რომ ტელეკომპანია „საქართველო“ სალიცენზიო პირობებს არღვევდა და ეთერში საინფორმაციო გამოშვებას არ ურშვებდა. რატომ არ მოხდა ამ კომპანიის სანქცირება?

ეგ მონიტორინგის სამსახურს უნდა ჰკითხოთ, ვერ გეტყვით, რატომ მოხდა ასე.

აკაკი სიხარულიძესთან დაკავაშირებით მომხდარ ინცინდენტზეც უნდა გკითხოთ...

სასაცილო რამე მოხდა, ჩემი აზრით.

მისი თქმით, კომისია იგნორირებას უკეთებს და შესაძლოა მან კომისია დატოვოს.

მე ნაკლებად წარმომიდგენია,  რომ აკაკი სიხარულიძემ კომისია დატოვოს. გუშინ იყო ჩვეულებრივი სამუშაო შეხვედრა. კომისიის არც ერთი წევრი არ ვესწრებიდით. ძალიან უცნაურია, რომ ეს ყველაფერი ახლა ხდება. აქამდე ხმას რატომ არ იღებდა, რატომ იყო ჩუმად? ბოლო ორ კვირაში მოხდა მისი იგნორირება და ჩაგვრა? ნუ მოისხამს ეს ხალხი გაჭირვებულის მანტიას. გუშინ რაც გაააკეთა ბატონმა აკაკიმ, რბილად რომ ვთქვათ, ძალიან გაუგებარია.

თქვენს სამწლიან მუშაობას როგორ შეაფასებდით? რა მიგაჩნიათ კომისიის ყველაზე მნიშვნელოვან მიღწევად?

კომისიამ მოახერხა მობილურ სექტორში კონკურენციის გაჩაღება, რაც უმნიშვენლოვანესი საკთხი იყო. ამ სექტორში კონკურენცია იყო ნული, ამიტომაც მაღალ ფასებს ვიხდიდით. დღეს 28 თეთრის ნაცვლად ათ თეთრად საუბარია შესაძლებელი

გამოვიკვლიეთ სიხშირეები და ტექნიკურად ურთულესი საქმე დავასრულეთ. ხვალ უკვე ეკონომიკის სამინისტროსა და პარლამენტში გავაგზავნით საკონსულტაციო დოკუმენტს. სეროზული ანალიზი გაქვს დადებული - შესაძლებელია თუ არა, რომ ოთხმა მობილურმა ოპერატორმა სრულფასოვნად იფუნქციონიროს.

ასევე მნიშვნელოვანია მობილურ ქსელებში წამობრივი დამრგვალებაც

რაც შეეხება მაუწყებლობის სფეროს?

მაუწყებლობის სფეროში ჩვენ დავდეთ ციფრულ მაუწყებლობაზე გადასვლის  საკონსულტაციო დოკუმენტი. ამ საკითხში ჩვენ ვერ შევასრულებთ პირველი ვიოლინოს როლს. წამყვანი ძალა ეკონომიკის სამინისტროა, თუმცა ჩვენ რაც გვევალებოდა, იმაზე უფრო მეტი გავაკეთეთ.

ბოლო პერიოდში ეკონომიკის სამინიასტროსთან გაქვთ კომუნიკაცია ამ საკითხთან დაკავშირებით?

ახალდანიშნულები არიან ეკონომიკის სამინისტროში, მათ უამრავი საქმე აქვთ. გავაგზავნეთ დოკუმენტი და ველოდებით მათ მოსაზრებებს.

პროექტის მხარდამჭერები არიან

Website Security Test