კონკურსები

1. კონკურსი აფხაზეთის მედიის ჟურნალისტებისათვის

აფხაზეთის ჟურნალისტთა კავშირმა გამოაცხადა კონკურსი სოფლის ყოფაზე, მის პრობლემებსა და პერსპექტივებზე შექმნილი საუკეთესო ნამუშევრის გამოსავლენად.

საინფორმაციო სააგენტო "აფსნიპრესის" ცნობით, კონკურსში მონაწილეობის მიღების უფლება აქვთ, აფხაზეთის ბეჭდური და ელექტრონული მედიის წარმომადგენლებს. "კონკურსის მიზანია, აფხაზეთის თანამედროვე სოფლის პრობლემებისადმი საზოგადოების ყურადღების მიპყრობა, სოფლის ცხოვრების ობიექტური გაშუქების სტიმულირება,"- განაცხადა აფხაზეთის ჟურნალისტთა კავშირის თავმჯდომარემ სერგეი კვიცინიამ.

კონკურსზე შეიძლება წარმოდგენილი იყოს საგაზეთო პუბლიკაციები, ტელე და რადიო სიუჟეტები. მათი ჟანრული მრავალფეროვნება შეზღუდული არ არის. "ეს შეიძლება იყოს ინტერვიუები, რეპორტაჟები და პრობლემატური სტატიები სოფლის თემატიკაზე",- დააზუსტა სერგეი კვიცინიამ.

საკონკურსოდ მიიღება ნამუშევრები, რომლებიც გამოქვეყნდება ან იქნება ტრანსლირებული კონკურსის გამოცხადების დღიდან 2006 წლის 1 სექტემბრამდე.