შემოგვიერთდი

21.07.2017 20:41

აფგან მუხთარლის საქმის დასრულებამდე თანამდებობებიდან გადააყენეს კონტრდაზვერვის და სასაზღვრო პოლიციის შეფები

Media Ge

შინაგან საქმეთა მინისტრმა გიორგი მღებრიშვილმა 20 ივლისს გამართულ ბრიფინგზე განაცხადა, რომ შსს-ს სასაზღვრო პოლიციის უფროსი დათო ნიკოლეიშვილი და სახელმწიფო უსაფრთხოების სამსახურის კონტრდაზვერვის დეპარტამენტის დირექტორი ოთარ კუპრაშვილი,  აფგან მუხთარლის საქმის  გამოძიების დასრულებამდე „დაკავებულ თანამდებობებს ტოვებენ“.
Media.Ge გთავაზობთ შსს-ს გვერდზე გამოქვეყნებული გიორგი მღებრიშვილის განცხადების სრულ ვერსიას:

საზოგადოების მაღალი ინტერესიდან გამომდინარე, მინდა, წარმოგიდგინოთ შუალედური ინფორმაცია აფგან მუხტარლის საქმეზე მიმდინარე გამოძიებასთან დაკავშირებით და გაგაცნოთ რამდენიმე მნიშვნელოვანი გადაწყვეტილება.

მიმდინარე წლის 30 მაისს, შსს-ს თბილისის პოლიციის დეპარტამენტის ძველი თბილისის სამმართველოს პირველ განყოფილებაში, აფგან მუხტარლის მეუღლის - ლეილა მუსტაფაევას ადვოკატის, არჩილ ჩოფიკაშვილის განცხადების საფუძველზე, დაიწყო გამოძიება აფგან მუხტარლის თავისუფლების უკანონოდ აღკვეთის ფაქტზე, დანაშაული გათვალისწინებული საქართველოს სისხლის სამართლის კოდექსის 143-ე მუხლის პირველი ნაწილით.

გამოძიების ფარგლებში განხორციელდა რიგი საგამოძიებო მოქმედებები.

კერძოდ: ამოღებული და დათვალიერებულია 46 კამერის ვიდეოჩანაწერი, მათ შორის, 10 ობიექტიდან, რომლებიც კოლმეურნეობის მოედანზე მდებარეობს. ასევე, მის მიმდებარე ტერიტორიაზე დათვალიერებულ იქნა 19 კამერის ვიდეოჩანაწერი. ნიკოლოზ ბარათაშვილის ქუჩაზე, N2-ში მდებარე „საქართველოს სახელმწიფო ელექტროსისტემის“ ობიექტის ვიდეოჩანაწერში ფიქსირდება, რომ პიროვნება, თეთრი ფერის მაისურით, სავარაუდოდ, აფგან მუხტარლი N4 მიკროავტობუსში ჯდება.

გამოძიების მიერ გამოიკითხა N4 მიკროავტობუსის ყველა მძღოლი (22 მოწმე), რომლებმაც განმარტეს, რომ მათი მარშრუტი მოიცავს შემდეგ ტერიტორიას: მეტროსადგურ „300 არაგველებიდან“, კოლმეურნეობის მოედნის და ჭონქაძის ქუჩის გავლით, გოთუას ქუჩამდე და მათ 2017 წლის 29 მაისს საეჭვო არაფერი შეუნიშნავთ.

გამოძიების მიერ ბარათაშვილის ქუჩაზე და მის მიმდებარედ გამოიკითხა ათეულობით მოწმე: ავტოსადგომის მუშაკები, ტაქსის მძღოლები, გარემოვაჭრეები და კერძო ობიექტების დაცვის თანამშრომლები, რომლებმაც განმარტეს, რომ მიმდინარე წლის 29 მაისს არ დაუნახავთ ვინმეს მიმართ ფიზიკური შეურაცხყოფის ან ავტომანქანით გატაცების ფაქტი, ასევე, არ შეუნიშნავთ სხვა რაიმე საეჭვო გარემოება.

ამასთან, 4 ობიექტიდან, რომლებიც აფგან მუხტარლის საცხოვრებელი სახლის მიმდებარე ტერიტორიაზე მდებარეობს, ამოღებული და დათვალიერებულია 27 კამერის ვიდეოჩანაწერი. აღნიშნულ ჩანაწერებში, მოცემულ პერიოდში აფგან მუხტარლი არ ფიქსირდება.

ნიაღვრისა და ჭონქაძის ქუჩებზე და მათ მიმდებარე ტერიტორიაზე, გამოიკითხა 127 მოწმე, რომლებმაც განმარტეს, რომ 2017 წლის 29 მაისს არ დაუნახავთ ვინმეს მიმართ ფიზიკური შეურაცხყოფის ან ავტომანქანით გატაცების ფაქტი, ასევე, არ შეუნიშნავთ სხვა რაიმე საეჭვო გარემოება.

აღნიშნულ სისხლის სამართლის საქმეზე გამოიკითხა შინაგან საქმეთა სამინისტროს სასაზღვრო პოლიციის დეპარტამენტის 61 თანამშრომელი, რომლებმაც განმარტეს, რომ 2017 წლის 29 მაისს ლაგოდეხის სასაზღვრო გამშვებ პუნქტში, დედოფლისწყაროსა და სიღნაღის რაიონებში არსებულ სასაზღვრო ზოლში, რაიმე სახის ინციდენტს ან საეჭვო გარემოებას ადგილი არ ჰქონია.

სისხლის სამართლის საქმეზე სულ გამოკითხულია 343 მოწმე.

სასამართლო განჩინებით შპს „მაგთიკომიდან“ გამოძიებამ გამოითხოვა 2017 წლის 25 მაისიდან 30 მაისის ჩათვლით აფგან მუხტარლის მფლობელობაში არსებული მობილური ტელეფონის ნომერზე შემავალი და გამავალი ზარების დეტალური ნუსხა, ასევე, ინფორმაცია ტელეფონის ე.წ. იმეი კოდებისა და მომსახურე ანძების თაობაზე.

გამოძიების მიერ, აზერბაიჯანის რესპუბლიკის შესაბამის ორგანოებს, სამართლებრივი დახმარების აღმოჩენის მიზნით, გაეგზავნათ შუამდგომლობა მათ წარმოებაში არსებული სისხლის სამართლის საქმის მასალების გამოთხოვისა და აფგან მუხტარლის დეტალური დაკითხვის თაობაზე, ასევე, ეთხოვათ დაკითხვის დროს ქართული მხარის დასწრების შესახებ.

აფგან მუხტარლის მეუღლეს - ლეილა მუსტაფაევას და მის მცირეწლოვან შვილს დაენიშნათ დაცვის სპეციალური ღონისძიება - პირადი დაცვა, რაზედაც ლეილა მუსტაფაევამ უარი განაცხადა.

აფგან მუხტარლის და ლეილა მუსტაფაევას ინტერესების დამცველი ადვოკატი, არჩილ ჩოფიკაშვილი გაეცნო სისხლის სამართლის საქმის წერილობით მასალებს და მას მიეცა ამოღებული ვიდეოჩანაწერების დათვალიერების საშუალება.

ამჟამად საქმეზე გრძელდება გამოძიება.

აქვე, ამ საკითხთან დაკავშირებით, მინდა, გაგაცნოთ რამდენიმე მნიშვნელოვანი გადაწყვეტილება. რა თქმა უნდა, ამის თაობაზე გვქონდა აქტიური კომუნიკაცია სახელმწიფო უსაფრთხოების სამსახურთან.

გამომდინარე იქიდან, რომ ეს საქმე განეკუთვნება საზოგადოების მაღალი ინტერესის სფეროს და სწორედ ასეთი საქმეების მიმართ ჩვენი დამოკიდებულება განსაზღვრავს ჩვენი უწყებების რეპუტაციას, ძალიან მნიშვნელოვანია, რომ საზოგადოებას მიმდინარე გამოძიებასთან, საზღვრის ეფექტურ კონტროლთან და კონტრდაზვერვითი საქმიანობის მწარმოებელ სამსახურებთან მიმართებაში, არავითარი კითხვა არ დარჩეს.

ამიტომ, ზემოაღნიშნულ უწყებასთან კონსულტაციის შემდეგ, მიღებულია ერთობლივი გადაწყვეტილება და შესაბამისი სამსახურების ხელმძღვანელები, რომლებიც უშუალოდ არიან პასუხისმგებელნი, ერთი მხრივ, სახელმწიფო საზღვრის კონტროლზე და მეორე მხრივ, კონტრდაზვერვით საქმიანობაზე - შსს-ს სასაზღვრო პოლიციის უფროსი და სახელმწიფო უსაფრთხოების სამსახურის კონტრდაზვერვის დეპარტამენტის დირექტორი, გამოძიების დასრულებამდე, დაკავებულ თანამდებობებს ტოვებენ.

მოგეხსენებათ, გამოძიებას არ აქვს უფლება გამორიცხოს რომელიმე ვერსია და, ვინაიდან ნებისმიერ შემთხვევაში მოხდა საზღვრის კვეთა გაურკვეველ ვითარებაში, მიღებულია შესაბამისი გადაწყვეტილება.

მიმაჩნია, რომ შესაბამისი ხელმძღვანელი პირების მიერ თანამდებობების დატოვება, ძალიან მნიშვნელოვანი ნაბიჯია სამომავლოდ საქმის ირგვლივ ყოველგვარი დაუსაბუთებელი ინტერპრეტაციის თავიდან ასაცილებლად.

პროექტის მხარდამჭერები არიან

Website Security Test